മൊബൈല്‍ ഫോണ്‍ വിവാഹബന്ധം തകര്‍ക്കുമോ?

മൊബൈല്‍ ഇന്നത്തെ സമൂഹത്തിലുള്ള സ്ഥാനം മറക്കാനാവില്ല. ബിവറേജസ് കോര്‍പറേഷന്‍ കഴിഞ്ഞാല്‍ കൂടുതല്‍ തിരക്ക് ഇപ്പോള്‍ അനുഭവപ്പെടുന്നത് മൊബൈല്‍ ഫോണ്‍ വില്‍ക്കുന്ന കടകളിലാണെന്നു പറയാം.

ഗുണങ്ങള്‍ക്കൊപ്പം ദോഷങ്ങളും മൊബൈലിനുണ്ട്. എന്നാല്‍ വിവാഹബന്ധം തകര്‍ക്കുന്നതില്‍ മൊബൈലിന് എന്തെങ്കിലും പങ്കുണ്ടോയെന്നതാണ് ഇവിടെ ചര്‍ച്ചാവിഷയം. ഉണ്ടാകാം എന്നതു തന്നെയാണ് ഇതിനുത്തരം. സാധ്യത കുറവാണെങ്കിലും.

ഭാര്യയും ഭര്‍ത്താവും തമ്മില്‍ ഗൗരവമുള്ള വിഷയത്തെക്കുറിച്ച് സംസാരിച്ചു കൊണ്ടിരിക്കുകയാണെന്നു കരുതൂ. അപ്പോഴായിരിക്കും ആരുടേയും മൊബൈലില്‍ ഒരു കോള്‍ വരുന്നത്. ഇതെടുത്ത് ഒരാള്‍ സംസാരിച്ചു കൊണ്ടിരിക്കുകയാണെങ്കില്‍ മറുഭാഗത്ത് ഈര്‍ഷ്യയുണ്ടാകുന്നത് സ്വാഭാവികം. ഇതിന്റെ പേരില്‍ ദമ്പതികള്‍ തമ്മില്‍ വഴക്കുണ്ടാക്കുവാനുള്ള സാധ്യതയും തള്ളിക്കളയാനാവില്ല.

കിടപ്പറയില്‍ മൊബൈല്‍ വില്ലനാകുന്നത് അത്ര വിരളമൊന്നുമാകില്ല. ദമ്പതികള്‍ തമ്മിലുള്ള സ്വകാര്യനിമിഷങ്ങളിലായിരിക്കും പലപ്പോഴും വിളിയെത്തുന്നത്. അതും പ്രത്യേക കാര്യമൊന്നുമില്ലാതെ. ആര്‍ക്കും അലോസരമുണ്ടാകുന്നത് സാധാരണയാണ്.

ഓഫിസ് തിരക്കുകളൊഴിഞ്ഞ് വീട്ടിലെത്തിയ ശേഷം ഭാര്യയാണെങ്കിലും ഭര്‍ത്താവാണെങ്കിലും ഫോണില്‍ത്തന്നെയാകുന്നത് ആരുടേയും ക്ഷമ കെടുത്തുന്ന ഒരു കാര്യമാണ്. അതുപോലെയാണ് മുടക്കുദിവസങ്ങളിലും. ഇത് പരസ്പരം ഒരുമിച്ചു പങ്കിടാന്‍ ലഭിക്കുന്ന അല്‍പസമയം ഇല്ലാതാക്കുകയാണ് ചെയ്യുന്നത്.

ദമ്പതികള്‍ തമ്മിലുള്ള വഴക്കിനിടെയിലും മൊബൈല്‍ വില്ലനാകാം. ഇതിനിടയില്‍ ഫോണ്‍ വരുന്നതും സംസാരിക്കുന്നതും ദേഷ്യം കൂട്ടും.

സംശയരോഗമുള്ള ദമ്പതിമാരെങ്കില്‍ അടിയ്ക്കടി ആരുടെയെങ്കിലും, പ്രത്യേകിച്ച് ആണ്‍, പെണ്‍ സുഹൃത്തുക്കളുടെ വിളി വരുന്നതും ദാമ്പത്യത്തെ ബാധിയ്ക്കാം.