വഴക്കിനും വീക്കെന്‍ഡ്

Relationship

oi-Saritha

By Veena

Published: Friday, June 29, 2012, 11:19 [IST]

ഭാര്യാഭര്‍ത്താക്കന്മാര്‍ തമ്മില്‍ വഴക്ക് സാധാരണം. എന്നാല്‍ മിക്കവാറും ശനിയും ഞായറുമായിരിക്കും വഴക്കു മൂര്‍ച്ഛിക്കുന്നത്.

ഇതിനുള്ള പ്രധാന കാരണം വളരെ സിംപിള്‍. ഉദ്യോഗസ്ഥരായ ഭാര്യാഭര്‍ത്താക്കന്മാര്‍ക്ക് സാധാരണ ദിവസങ്ങളില്‍ തിരക്കും കാരണം ഒന്നിനും സമയമുണ്ടാകില്ല. ചിലപ്പോള്‍ രണ്ടുപേരും ഒരുമിച്ചു ചെലവിടുന്ന സമയം തന്നെ വിരളം. ഇത്തരം ഘട്ടങ്ങളില്‍ വഴക്കിടാനോ വഴക്കിനുള്ള കാരണം കണ്ടെത്താനോ നേരമുണ്ടാകില്ല.

അവധി ദിവസങ്ങളിലായിരിക്കും പല പ്രശ്‌നങ്ങളും കാര്യങ്ങളും ചര്‍ച്ച ചെയ്യാന്‍ സമയമുണ്ടാവുക. ഇത്തരം ചര്‍ച്ചകളില്‍ രണ്ടുപേരുടേയും അഭിപ്രായം വ്യത്യസ്തങ്ങളായാല്‍ ഒരു വഴക്ക് പൊട്ടിപ്പുറപ്പെടാന്‍ കാലതാമസമുണ്ടാകില്ല.

അവധി ദിവസങ്ങളില്‍ വീട്ടിലെ പണികളുടെ പേരിലും വഴക്കുണ്ടാകാന്‍ സാധ്യതയുണ്ട്. വീട്ടുജോലികള്‍ ചെയ്യുമ്പോള്‍ സഹായം വേണമെന്ന് ഭാര്യയും അവധി ദിവസം വിശ്രമിക്കാനുള്ളതാണെന്ന് ഭര്‍ത്താവും കരുതിയാല്‍ വഴക്കിനു പിന്നെന്തുവേണം.

അവധി ദിവസങ്ങളിലായിരിക്കും മിക്കവാറും പേര്‍ ഷോപ്പിംഗ് നടത്തുക. പ്രത്യേകിച്ച് ഇരുവരും ഉദ്യോസ്ഥരാകുമ്പോള്‍. വാങ്ങേണ്ട സാധനങ്ങളെച്ചൊല്ലിയും പണത്തെ ചൊല്ലിയും വഴക്കുണ്ടാകാനുള്ള സാധ്യതയും കൂടുതല്‍ തന്നെ.

അവധി ദിവസങ്ങളില്‍ ഉല്ലാസത്തിന് തയ്യാറെടുക്കുന്നതും ചിലപ്പോള്‍ വഴക്കിന് കാരണമാകും. ഏതു സ്ഥലം വേണം, അല്ലെങ്കില്‍ ഏതു സിനിമ വേണം തുടങ്ങിയ കാര്യങ്ങളും ചെറുതാണെങ്കിലും വഴക്കിനുള്ള കാരണമായേക്കാം.

ഇത്തരം വഴക്കുകള്‍ക്ക് പൊതുവെ ആയുസും കുറവായിരിക്കും. സൗന്ദര്യപ്പിണക്കങ്ങള്‍ എന്നു വേണമെങ്കില്‍ പറയാം. എന്നാല്‍ ചിലരുടെ കാര്യത്തില്‍ നിസാര കാര്യങ്ങളും വലിയ വഴക്കിന് ഇട വരുത്തിയേക്കും.