'ക്ഷമിച്ചു' എന്നൊരു വാക്ക്

Relationship

oi-Saritha

By Veena

Published: Tuesday, May 8, 2012, 14:24 [IST]

സൗന്ദര്യപ്പിണക്കം, ഇത് ദമ്പതിമാര്‍ക്കിടയിലാണെങ്കിലും കാമുകീകാമുകന്മാര്‍ക്കിടയിലാണെങ്കിലും പതിവാണ്. ഇത് ബന്ധങ്ങള്‍ക്ക് ശക്തി പകരുകയും ചെയ്യും. വഴക്കു മാറിയാല്‍ പരസ്പം ആരാദ്യം മിണ്ടും, അല്ലെങ്കില്‍ ക്ഷമ പറയും എന്നൊരു മത്സരവും പതിവാണ്. വഴക്കിനെ തുടര്‍ന്ന് ക്ഷമ പറയുവാനും ഒരു തഞ്ചം വേണം.

തെറ്റ് തന്റെ ഭാഗത്താണെന്നു കണ്ടാല്‍ ക്ഷമ പറയാന്‍ മടിക്കേണ്ടതില്ല. മുഖം വീര്‍പ്പിച്ചോ അല്ലെങ്കില്‍ യാതൊരു മയവുമില്ലാത്ത സ്വരത്തിലോ ക്ഷമ പറഞ്ഞിട്ടെന്തു കാര്യം. സ്വാഭാവിക രീതിയില്‍ ക്ഷമ പറയുന്നതായിരിക്കും നല്ലത്.

വല്ലാതെ താണുകേണുള്ള ക്ഷമ പറച്ചിലോ അല്ലെങ്കില്‍ വാക്കുകളില്‍ കൃത്രിമമധുരം പുരട്ടിയുള്ള ക്ഷമയോ ഒഴിവാക്കുക. തെറ്റു പറ്റുക സാധാരണം. അത് തിരുത്തേണ്ടതും പ്രധാനം. എന്നാല്‍ ഇതിന്റെ പേരില്‍ സ്വന്തം വ്യക്തിത്വം പണയം വച്ചിട്ടുള്ള കളി ഒഴിവാക്കുക. ഇത് പങ്കാളിക്കു മുന്നില്‍ സ്വയം താഴ്ത്തിക്കെട്ടുന്നതിന് തുല്യമായിരിക്കും.

കണ്ണിലും വാക്കിലും അഹങ്കാരം ബാക്കി വച്ചിട്ടുള്ള ക്ഷമാപണം ആരും സ്വീകരിച്ചെന്നു വരില്ല. വെറു വാക്കില്‍ പറയേണ്ടതല്ല ക്ഷമ. കുറ്റബോധം മനസിലുണ്ടാകേണ്ടത് പ്രധാനം. ക്ഷമ പറച്ചില്‍ ആത്മാര്‍ത്ഥതയോടെയായിരിക്കണം.

തെറ്റു ചെയ്തിട്ടില്ലെന്ന് ഉറപ്പുണ്ടെങ്കില്‍ ക്ഷമാപണം ഒഴിവാക്കാം. ആവശ്യമില്ലാതെ താണു കൊടുക്കുന്നതും നല്ല പ്രവണതയല്ല. ഇത് ചിലപ്പോള്‍ മറുഭാഗം ഒരു ശീലമാക്കി മാറ്റിയാലോ.

ചെറിയ സമ്മാനങ്ങളിലൂടെ വേണമെങ്കിലും ക്ഷമ പറയാം. പങ്കാളിക്ക് ഇഷ്ടമുള്ള സാധനങ്ങള്‍ നോക്കി തെരഞ്ഞെടുക്കാം.

ചിലപ്പോള്‍ ഒരു പുഞ്ചിരിയോ സ്‌നേഹത്തോടെയുള്ള വാക്കോ മതിയാകും എല്ലാ പ്രശ്‌നങ്ങളും പറയാതെ തന്നെ പറഞ്ഞുതീര്‍ക്കാന്‍. മനസുകള്‍ തമ്മിലുള്ള അടുപ്പം ഇവിടെ പ്രധാനമാണ്.