വിവാഹജീവിതത്തിലെ പ്രശ്‌നക്കാര്‍

Relationship

oi-Saritha

By Veena

Published: Monday, May 7, 2012, 14:48 [IST]

വിവാഹം രണ്ടുപേരുടെ എല്ലാ അര്‍ത്ഥത്തിലുമുള്ള ഒത്തുചേരലാണ്. എന്നാല്‍ പല വിവാഹങ്ങളും പിന്നീട് പലവിധ കാരണങ്ങളാലും പ്രശ്‌നങ്ങളില്‍ എത്തിപ്പെടാറുണ്ട്. വിവാഹജീവിതം താറുമാറാക്കുന്ന ചില പ്രധാന പ്രശ്‌നങ്ങളെന്തെന്നു നോക്കൂ.

മിക്കവാറും കുടുംബങ്ങളില്‍ വില്ലനാവാറുണ്ട് പരസ്ത്രീ, പരപുരുഷ ബന്ധം. ഇത് വിവാഹബന്ധത്തിന്റെ കടയ്ക്കല്‍ കത്തി വയ്ക്കുന്ന ഒന്നായി മാറാറുണ്ട്. ഇത് പലപ്പോഴും ആത്മഹത്യയിലേക്കും കൊലപാതകങ്ങളിലേക്കും വഴി വയ്ക്കുന്ന കഥകളും കുറവല്ല.

മദ്യപാനം, മയക്കുമരുന്ന് ഉപയോഗം എന്നിവയും വിവാഹജീവിതത്തിന് തടസം നില്‍ക്കാറുണ്ട്. ഇവ ദമ്പതികള്‍ തമ്മിലുള്ള വഴക്കിലും ദേഹോപദ്രവത്തിലും വരെ കലാശിക്കും.

സ്ത്രീധനസമ്പ്രദായവും ഒരു പരിധി വരെ വരെ വിവാഹങ്ങളുടെ മരണമണി മുഴക്കുന്നുണ്ട്. ഇതെത്തുടര്‍ന്നുള്ള പീഡനങ്ങളും വഴക്കുകയും സമൂഹത്തിലെ ഒരു വിഭാഗം വിവാഹജീവിതത്തില്‍ പ്രശ്‌നമുണ്ടാക്കുന്നുണ്ട്.

വിവാഹബന്ധം സുതാര്യമായിരിക്കണമെന്നു പറയും. പങ്കാളികള്‍ തമ്മില്‍ ആവശ്യമില്ലാത്തത് ഒളിക്കുകയും കള്ളം പറയുകയും ചെയ്യുന്നത് പലപ്പോഴും തെറ്റിദ്ധാരണകളുണ്ടാക്കും. ഇതും ചിലപ്പോള്‍ വിവാഹമോചനങ്ങള്‍ക്ക് കാരണമാകാറുണ്ട്.

ഒരു ബന്ധത്തിലെ ഇഴയടുപ്പം കുറയുന്നതും ചിലപ്പോള്‍ പ്രശ്‌നങ്ങളുണ്ടാക്കും. മാനസിക അടുപ്പം പ്രധാനം. ഇതില്ലാത്തത് പലപ്പോഴും ഭാവിയില്‍ പ്രശ്‌നങ്ങളുണ്ടാക്കും.

വിവാഹബന്ധം തകര്‍ക്കുന്നതില്‍ സാമ്പത്തികത്തിനും പ്രധാന സ്ഥാനമുണ്ട്. സാമ്പത്തിക പ്രശ്‌നങ്ങള്‍ കൂടുന്നതിന്റെ പേരിലും ആഗ്രഹിക്കുന്നത് ലഭിക്കാത്തതിന്റെ പേരിലും അസ്വസ്ഥരാകുന്നവരുണ്ട്. ഇത് പരസ്പരമുള്ള വഴക്കുകള്‍ക്കും പഴി ചാരലുകള്‍ക്കും ഇട വരുത്തും. ഇത് മൂര്‍ദ്ധന്യാവസ്ഥയിലാകുന്നത് ദാമ്പത്യബന്ധത്തിന്റെ താളം തെറ്റിക്കുകയും ചെയ്യും.