നിങ്ങള്‍ ഭാര്യയെ സ്‌നേഹിക്കുന്നുണ്ടോ?

മറ്റൊരു സ്ത്രീയുമായി ഭാര്യയെ താരതമ്യപ്പെടുത്താതിരിക്കുക. അത് നിങ്ങളുടെ അമ്മയോ പെങ്ങളോ ആയിട്ടാണെങ്കില്‍ പോലും. ഇത്തരം താരതമ്യപ്പെടുത്തലുകള്‍ സ്ത്രീകള്‍ പൊതുവെ ഇഷ്ടപ്പെടില്ല. ഓരോരുത്തര്‍ക്കും അവരുടേതായ വ്യക്തിത്വമുണ്ടെന്ന് തിരിച്ചറിയുക.

സൗഹൃദങ്ങളെ തുറന്ന മനസോടെ കാണാന്‍ കഴിയാത്തയാളാണ് ഭാര്യയെങ്കില്‍ ഓഫീസിലെ സ്ത്രീകളായ ചങ്ങാതിമാരെക്കുറിച്ചോ ജോലിക്കാരെക്കുറിച്ചോ പറയാതിരിക്കുകയാണ് നല്ലത്. വെറുതെ സംശയത്തിനിട നല്‍കേണ്ടതില്ലല്ലോ. അറിയാന്‍ താല്‍പര്യം കാണിച്ചാല്‍ മാത്രം ഇവരെക്കുറിച്ച് മിതമായ ഭാഷയില്‍ പറയാം.

ജോലി കഴിഞ്ഞ് വീട്ടില്‍ വന്നു കയറിയാലുടന്‍ കുറ്റങ്ങള്‍ കണ്ടുപിടിച്ച് പറയാതിരിക്കുക. വീടു വൃത്തിയായിട്ടില്ല, പേപ്പര്‍ അവിടെയിവിടെ വീണു കിടക്കുന്നു തുടങ്ങിയ കുറ്റപ്പെടുത്തലുകള്‍ വേണ്ട്. ഇത് പിന്നീടെപ്പോഴെങ്കിലും പറഞ്ഞ് മനസിലാക്കിക്കൊടുക്കുന്നതാണ് നല്ലത്.

ഭാര്യയുടെ പാചകത്തെ കുറ്റം പറയരുത്. പ്രത്യേകിച്ച് മറ്റുള്ളവരുടെ മുന്നില്‍. ഇത് ഭാര്യയെ അപമാനിക്കുന്നതിന് തുല്യമാകും. പ്രശ്‌നങ്ങളുണ്ടെങ്കില്‍ ഇരുവരും തനിച്ചാകുമ്പോള്‍ നല്ല രീതിയില്‍ പറയാം.

പരസ്പരം വഴക്കുണ്ടാകുമ്പോള്‍ ഭാര്യയുടെ മാതാപിതാക്കളെ പഴി ചാരാതിരിക്കുക. ഇത് അവര്‍ ഒരിക്കലും സഹിച്ചെന്നു വരില്ല. ബന്ധം എന്നത് എല്ലാവര്‍ക്കും വലുതാണ്. എന്തെങ്കിലും കുറ്റത്തിന് മറ്റുള്ളവരെ പഴി ചാരുന്നത് നല്ല ശീലവുമല്ല.