സൗഹൃദത്തിന്റെ അതിര്‍വരമ്പു ലംഘിക്കുമ്പോള്‍

Published: Monday, March 19, 2012, 12:43 [IST]

നിറം സിനിമയിലെ എബിയെയും സോനയേയും ഓര്‍മയില്ലേ. സൗഹൃദം പ്രണയമാണെന്നുള്ള വൈകിയ തിരിച്ചറിയലായിരുന്നു ക്യാമ്പസ് പശ്ചാത്തലത്തിലുള്ള ഈ സിനിമയുടെ പ്രമേയം. ശാലിനിയും കുഞ്ചാക്കോ ബോബനും അഭിനയിച്ച ഈ ചിത്രം സൗഹൃദത്തിന്റെ മറ്റൊരു തലമാണ് കാട്ടിത്തരുന്നത്.

ഇത് വെറും കഥയാണെന്നു പറഞ്ഞ് തട്ടിക്കളയാന്‍ പറ്റില്ല. കാരണം ഇത്തരം സൗഹൃദപ്രണയങ്ങള്‍ നിരവധിയുണ്ടെന്നതു തന്നെ. സൗഹൃദമാണോ പ്രണയമാണോ എന്ന ആശയക്കുഴപ്പത്തില്‍ നില്‍ക്കുന്നവര്‍ ഇതൊന്നു വായിച്ചുനോക്കൂ.

രണ്ടു സുഹൃത്തുക്കള്‍ ഒരുമിച്ചുള്ളപ്പോള്‍ സന്തോഷം തോന്നുന്നത് സ്വാഭാവികം. എന്നാല്‍ ഒരാള്‍ എപ്പോഴും മറ്റേയാളുടെ സാന്നിദ്ധ്യം ആഗ്രഹിക്കുകയാണെങ്കില്‍, മറ്റു സുഹൃത്തുക്കള്‍ കൂടെയുള്ളപ്പോഴും ഈ ഒരാള്‍ ഇല്ലാതായാല്‍ ശൂന്യത തോന്നുകയാണെങ്കില്‍ ഉറപ്പിച്ചോളൂ, നിങ്ങള്‍ പ്രണയത്തിലേക്കടുക്കുകയാണ്.

സന്തോഷവും ദുഖവും തന്റെ സംബന്ധിച്ച എല്ലാ കാര്യങ്ങളും പരസ്പരം തുറന്നു പങ്കുവയ്ക്കുന്നത് സൗഹൃദവും ഒപ്പം പ്രണയവുമാകാം.

ഒരാള്‍ മറ്റൊരാളുടെ, അത് പൊതുവായ ഒരു സുഹൃത്തായാല്‍ പോലും, ഒപ്പം സമയം പങ്കിടുകയും സംസാരിക്കുകയും ചെയ്യുന്നതു കാണുമ്പോള്‍ ആവശ്യമില്ലാത്ത അരിശവും അസൂയയും തോന്നുന്നത് വെറും സൗഹൃദലക്ഷണം മാത്രമല്ലെന്നു തിരിച്ചറിയുക.

സുഹൃത്തിനെ എപ്പോഴും കാണണമെന്നുള്ള തോന്നലുണ്ടാകുകയാണെങ്കില്‍ ഇതും പ്രണയമാകാം.