സൗന്ദര്യപ്പിണക്കം വൃത്തികേടാക്കല്ലേ

വഴക്കു മൂക്കുമ്പോള്‍ നീയെന്റെ ചിലവിലാണ് ജീവിക്കുന്നതെന്ന പ്രയോഗം ചിലപ്പോഴുണ്ടാകാറുണ്ട്. ഇതിനെ ചീപ്പ് പ്രയോഗം എന്നു മാത്രം പറഞ്ഞാല്‍ പോര, ഒരാളുടെ അധികാര മനോഭാവവും മറ്റൊരാളുടെ നിസഹായാവസ്ഥയുമാണ് കാണിക്കുന്നത്. മിക്കവാറും ഭര്‍ത്താവ് വരുമാനമില്ലാത്ത ഭാര്യയോട് പറയുന്ന ഒന്നാണിത്. ചുരുക്കം ചിലപ്പോള്‍ മറിച്ചുമാകാം.

അമ്മായിയമ്മയെ ചൊല്ലി ചിലപ്പോള്‍ ഭാര്യാ ഭര്‍തൃകലഹം ഉണ്ടാകാറുണ്ട്. നിങ്ങളുടെ അമ്മ എന്നെ ഒഴിവാക്കാനാണ് ശ്രമിക്കുന്നതെന്ന് ചില ഭാര്യമാരെങ്കിലും പറയുന്നതു കേള്‍ക്കാം. ഇത് ഭര്‍ത്താവിന്റെ കണ്ണില്‍ നിങ്ങളുടെ വിലയിടിച്ചു കാണിക്കും. സ്വന്തം അമ്മയോട് ചിലര്‍ക്കെങ്കിലും നീരസമുണ്ടാക്കുകയും ചെയ്യും.

കുട്ടികളുടെ പേരില്‍ പരസ്പരം പഴി ചാരുന്നത് ചില ഭാര്യാഭര്‍ത്താക്കന്മാരുടെയെങ്കിലും ശീലമായിരിക്കും. നിങ്ങളൊരു നല്ല അമ്മയല്ലാ, അല്ലെങ്കില്‍ അച്ഛനല്ലാ എന്നുള്ള പഴിചാരല്‍ കുട്ടികളുടെ മുന്നില്‍ വച്ചാണെങ്കില്‍ തീര്‍ത്തും മോശമാകും.

ഇനി ഇക്കാര്യം ആവര്‍ത്തിച്ചാല്‍ ഞാനെന്റെ വീട്ടില്‍ പോകും എന്നുള്ള ഭീഷണി ചില ഭാര്യമാര്‍ പ്രയോഗിക്കാറുണ്ട്. ഇത് വഴക്കിന്റെ മറ്റൊരു വൃത്തികെട്ട മുഖം. ഇത്തരം കാര്യങ്ങള്‍ ചെറിയ വഴക്ക് വലുതിലേക്കു മാറാനുള്ള സാഹചര്യമുണ്ടാക്കുമെന്നോര്‍ക്കുക.