വിവാഹം, ചില ചിന്താവശങ്ങള്‍

Published: Tuesday, February 14, 2012, 13:00 [IST]

വിവാഹത്തെ കുറിച്ച് നല്ലതും ചീത്തയുമായ കാഴ്ചപ്പാടുകളും അനുഭവങ്ങളും ഉള്ളവരുണ്ട്. വിവാഹം കഴിയ്ക്കാന്‍ തുനിയുന്നവരെ കുഴിയിലേക്ക് എടുത്തുചാടല്ലേ എന്ന് തമാശയായെങ്കിലും ഉപദേശിക്കുന്നവരുമുണ്ട്. സ്വാതന്ത്ര്യം വിവാഹത്തോടെ അവസാനിക്കുന്നുവെന്ന കാഴ്ചപ്പാടുള്ളവരുമുണ്ട്. ഇതിനെല്ലാമപ്പുറം ചില യാഥാര്‍ത്ഥ്യങ്ങളുണ്ട്.

സത്യത്തില്‍ വിവാഹം ഒരാളുടെ ജീവിതത്തില്‍ സ്ഥിരത വരുത്തുകയാണ് ചെയ്യുന്നത്. അതു തന്നെയാണ് ഏറ്റവും വലിയ മാറ്റവും. ജോലി കഴിഞ്ഞ് അവിടെയും ഇവിടെയും ചുറ്റിത്തിരിയുന്നതിന് പകരം വീട്ടില്‍ പോകണം എന്ന തോന്നലുണ്ടാക്കുന്ന ഒരു ഘടകം.

സങ്കടമാണെങ്കിലും സന്തോഷമാണെങ്കിലും എല്ലാം പങ്കുവയ്ക്കാന്‍ ഒരാളെ കിട്ടുകയാണ്, വിവാഹത്തിലൂടെ. ഇതിനിടയിലുണ്ടാകുന്ന ചെറിയ പിണക്കങ്ങളും വാക്കുതര്‍ക്കങ്ങളും സ്വാഭാവികം.

ഉത്തരവാദിത്വമില്ലാതെ കറങ്ങിത്തിരിയുന്നവര്‍ക്ക് ഉത്തരവാദിത്വം ഉണ്ടാക്കിക്കൊടുക്കാനുള്ള പറ്റിയ മാര്‍ഗമാണിത്. ഉത്തരവാദിത്വം വരുമ്പോള്‍ പക്വതയും ഇരുത്തവും വരുന്നതും സാധാരണം.

എല്ലാറ്റിനുമുപരിയായി ജീവിതകാലം മുഴുവന്‍ നീണ്ടു നില്‍ക്കുന്ന ഒരു ബന്ധം എന്ന കണക്കുകൂട്ടലിലാണ് മിക്കവാറും പേര്‍ വിവാഹപ്പന്തലിലേക്ക് ഇറങ്ങുന്നത്. ഭാവി അവര്‍ക്കു വേണ്ടി കാത്തുവച്ചിരിക്കുന്നതെന്തായാലും ഇത്തരം തോന്നല്‍ തന്നെ ജീവിക്കാനൊരു അത്താണിയാകും, ചിലര്‍ക്കെങ്കിലും.

അതുകൊണ്ട് വിവാഹം വേണ്ട എന്ന് തീരുമാനിക്കും മുന്‍പ് ഒന്നാലോചിക്കൂ...