'ബിയറിന്റെ മണം'

Relationship

oi-Saritha

By Veena

Published: Monday, February 6, 2012, 9:03 [IST]

ബിയറിന്‍റെ മണമാണ് നിനക്കെന്ന് പറഞ്ഞത് വെറുതെയല്ലെന്ന് അറിയിക്കാനാണ് കഴിഞ്ഞ തവണ വന്നപ്പോള്‍ ഒരു കുപ്പി ബിയറും കൊണ്ട് വന്നത്. വിലകൂടിയ ബിയറുകള്‍ പലതുമുണ്ടായിട്ടും, നിനക്കു വേണ്ടിയാണെങ്കില്‍ അവയിലൊന്ന് വാങ്ങാനുള്ള പണം കൈയിലുണ്ടായിട്ടും അതൊന്നും വാങ്ങാതെ യു ബി എക്സ്പോര്‍ട്ട് തന്നെ കൊണ്ടു വന്നത് കൃത്യമായും അതിന്‍റെ മണമാണ് നിനക്ക് എന്നതിനാലായിരുന്നു. എന്നിട്ടും അതൊന്നു മണത്തു നോക്കാന്‍ പോലും നീ കൂട്ടാക്കാതിരുന്നത് എന്നെ അത്ഭുതപ്പെടുത്തി.

യൂണിവേഴ്സിറ്റിയില്‍, ചില രാത്രികളില്‍ ഫിസിക്സ് ഡിപ്പാര്‍ട്‍മെന്‍റിന്‍റെ പിന്നിലെ നമ്മുടെ ഒളി കേന്ദ്രങ്ങളില്‍ വെച്ച്, ഞാനും സുഹൃത്തു കൊണ്ടുവരാറുള്ള കൂതറ റം ഐറ്റങ്ങള്‍ പോലും നിലത്തു വെക്കാതെ ഒറ്റിക്കുടിച്ചിരുന്ന നിനക്ക് ഇപ്പോള്‍ സംഭവിച്ചിരിക്കുന്ന മാറ്റം എന്നെ അത്ഭുതപ്പെടുത്തുന്നുണ്ട്. എന്‍റെ ആശയക്കുഴപ്പം കൂട്ടുന്ന മറ്റൊരു കാര്യം കൂടി പറയട്ടെ. നിനക്കിപ്പോഴും ബിയറിന്‍റെ മണം തന്നെയാണ്! വിജയ് മല്യയുടെ ഏതെല്ലാമോ ഡിസ്റ്റില്ലറികളില്‍ നിന്ന് പുറത്തുവരുന്ന, കൃത്രിമ പഴക്കം വരുത്തിയ അതേ യു ബി എക്സ്പോര്‍ട്ടിന്‍റെ മണം!

നീ മദ്യപാനം നിറുത്തി എന്നത് നല്ല കാര്യം തന്നെ. ആരോഗ്യത്തിന് അത് വളരെ നല്ലതാണ്. സ്ത്രീകളില്‍ മദ്യപാനമുണ്ടാക്കുന്ന പ്രശ്നങ്ങള്‍ സംബന്ധിച്ച് നിരവധി ലേഖനങ്ങള്‍ ഈയിടെയായി ഞാന്‍ വായിച്ചു കൂട്ടുന്നുണ്ട്. (ഇത്തരം കൂതറ ഐറ്റങ്ങള്‍ കൈകാര്യം ചെയ്യുന്ന ഒരു സൈറ്റ് നിരന്തരമായി വായിക്കേണ്ട ഗതികേട് ഈയിടെയായി വന്നുപെട്ടിരിക്കുന്നു. പത്രപ്രവര്‍ത്തനം പഠിക്കുന്നതിനു മുന്‍പ് ഇത്തരം അപകടങ്ങളെക്കുറിച്ച് ഞാനത്ര ബോധവാനായിരുന്നില്ല). എന്തായാലും ആ ലേഖനങ്ങളൊന്നും തന്നെ സ്ത്രീകളുടെ മദ്യപാനത്തെ വല്ലാതെ അനുകൂലിക്കുന്നില്ല.

ഇതു സംബന്ധിച്ച് ഞാന്‍ നമ്മുടെ രാധികയുമായി ഈയിടെ സംസാരിച്ചിരുന്നു. (രാധികയെ കണ്ടിരുന്നു. അവളുടെ ശിവജിനഗറിലുള്ള വീട്ടില്‍ ഒരു ദിവസം തങ്ങി. നീ കെറുവിക്കണ്ട. അവളുടെ ഭര്‍ത്താവും അയാളുടെ തടിയനായ അനിയനും ചെവി കേള്‍ക്കില്ലെങ്കിലും കണ്ണ് നന്നായി കാണാവുന്ന അമ്മായിയച്ഛനും അവിടെയുണ്ടായിരുന്നു. അവളുടെ ഭര്‍ത്താവ് അടുത്തില്ലാതിരുന്നപ്പോഴൊക്കെ യൂണിവേഴ്സിറ്റി ദിനങ്ങള്‍ തന്നെയായിരുന്നു ഞങ്ങളുടെ പ്രധാന സംസാര വിഷയം). രാധിക അമ്മയാവാന്‍ ആഗ്രഹിക്കുന്നു. എന്നാല്‍ വിവാഹം കഴിഞ്ഞ ശേഷവും സജീവമായി തുടര്‍ന്ന മദ്യപാനം അവളുടെ ആഗ്രഹത്തിന് ചില തടസ്സങ്ങള്‍ ഉണ്ടാക്കിയിരിക്കുന്നു.

പക്ഷെ ഞാന്‍ ചോദിക്കാന്‍ വിചാരിച്ചത് ഇതൊന്നുമല്ല. അത് ചോദിക്കും മുന്‍പ് പറയട്ടെ, ഇതിന് എനിക്ക് മറുപടി കിട്ടണം. നമ്മുടെ പഴയ ഇന്‍ലന്‍ഡ് കാലങ്ങളെ ഓര്‍മിച്ചെടുക്കുവാനും മുരടിക്കുന്ന മനസ്സിന് ഇത്തിരി പനിനീര്‍ തളിക്കുവാനും കഴിയുമെന്ന തോന്നല്‍ കൊണ്ടാണ് ഞാന്‍ ഇന്‍ലന്‍ഡില്‍ തന്നെ എഴുതിവിടുന്നത്. നീ എനിക്കൊരു മെയില്‍ ചെയ്താല്‍ മതി. ചോദ്യം ഇതാണ്: നീ വിവാഹം ആഗ്രഹിക്കുന്നുണ്ടോ?

വളരെ സീരിയസ്സായി ഈ ചോദ്യം ചോദിച്ചിരുന്ന കാലം ഓര്‍ത്തുപോകുന്നു. അന്നെന്തൊരു പേടിയായിരുന്നു നമുക്ക്! മറ്റുള്ളവര്‍ ശ്രദ്ധിക്കുന്നുണ്ടെന്ന തോന്നലില്‍ പരിഭ്രാന്തമായിരുന്നു നമ്മുടെ ഓരോ ചലനങ്ങളും. പൊലീസുകാരുടെയും മോറല്‍ പൊലീസുകാരുടെയും എത്രയെത്ര വാണിംഗുകള്‍.... ?

ആ കാലത്തിനു ശേഷം കളിയായി നിരവധി തവണ ഞാനീ ചോദ്യം ചോദിച്ചു. അപ്പോഴേക്ക് ഗോവയ്ക്കു പോകാന്‍ മുല്ലപ്പൂ ചൂടിവന്ന ആ പെണ്‍കുട്ടിയില്‍ നിന്ന് നീയും വളരെ വളര്‍ന്നിരുന്നല്ലോ?

ഇപ്പോള്‍ ആ ചോ‍ദ്യം ഞാന്‍ ആവര്‍ത്തിക്കുന്നു. ആദ്യമായെന്ന വണ്ണം അതേ സീരിയസ്നെസ്സോടെ, അതേ വിറയലോടെ. നീ വിവാഹം കഴിക്കാന്‍ ആഗ്രഹിക്കുന്നുണ്ടോ?