പ്രണയം സെക്‌സ് ഫ്രീ; രോഗങ്ങളും ഫ്രീ

Relationship

oi-Siji KM

By Lakshmi

Published: Thursday, March 25, 2010, 15:14 [IST]

ഇന്നത്തെ കാലത്ത് പ്രണയ ബന്ധങ്ങള്‍ സെക്‌സ് ഫ്രീയാണ്. വിവാഹശേഷം മാത്രമേ ലൈംഗികബന്ധം പാടുള്ളുവെന്ന പണ്ടത്തെ വിശ്വാസപ്രമാണങ്ങളെ തീര്‍ത്തും നിരാകരിച്ചാണ് ഇന്നത്തെ സമൂഹം നീങ്ങുന്നത്.

മുന്‍പൊക്കെ ലൈംഗികതയില്‍ കൂടുതല്‍ സ്വാതന്ത്ര്യമുള്ളത് പുരുഷനാണെന്നായിരുന്നു പൊതുവെയുള്ള വിശ്വാസം, അതേണ്ടാണ്ട് അങ്ങനെ തന്നെയായിരുന്നുതാനും. എന്നാല്‍ ഇപ്പോള്‍ ഇക്കാര്യത്തില്‍ ഇന്നത്തെ സ്ത്രീകള്‍ പുരുഷന്മാരെ കടത്തിവെട്ടുമെന്നുതന്നെയാണ് സൂചന.

ഇന്നത്തെ യുവതികള്‍ വെവ്വേറെ പങ്കാളികള്‍ക്കൊപ്പം ലൈംഗികത ആസ്വദിക്കുന്നതില്‍ കുഴപ്പമൊന്നും കാണാത്തവരാണ്. ഫാഷന്‍, ജോലി, എന്തിന് മദ്യത്തിലും മയക്കുമരുന്നിലും വരെ സ്ത്രീകള്‍ സ്വാതന്ത്ര്യം പ്രഖ്യപിച്ച 1960കളിലെ അവസ്ഥ വച്ച് താരതമ്യം ചെയ്യുമ്പോള്‍ ഇന്നത്തെ അവസ്ഥ ഏറെ പുരോഗമിച്ചുപോയിരിക്കുന്നു.

അറുപതുകളില്‍ 24വയസ്സിനുള്ളില്‍ സ്ത്രീകള്‍ വെറും രണ്ട് പങ്കാളികള്‍ക്കൊപ്പം മാത്രമാണ് ശയിച്ചിരുന്നതെങ്കില്‍ ഇന്നത്തെ സ്ത്രീകള്‍ ഇതേ പ്രായത്തിനുള്ളില്‍ കുറഞ്ഞത് 5 പേര്‍ക്കെങ്കിലും ഒരു ലൈംഗിക ബന്ധത്തിലേര്‍പ്പെട്ടിരിക്കുമെന്നാണ് കണക്ക്.

ഇത് മാറുന്ന ലോകമാണെന്നും വിലക്കുകളില്ലാത്ത ലോകമാണ് ഞങ്ങള്‍ക്കു വേണ്ടതെന്നുമൊക്കെ വാചകമടിക്കാമെങ്കിലും ഈ പ്രവണത ആരോഗ്യത്തിന് അത്ര നല്ലതല്ലെന്നാണ് വിദഗ്ധര്‍ പറയുന്നത്. പല സ്ത്രീകളിലും ചെറുപ്പത്തിലേതന്നെ ലൈംഗികസംബന്ധമായ രോഗങ്ങള്‍ പിടിപെടാന്‍ ഈ ജീവിതരീതി കാരണമാകുന്നുണ്ട്.

ഒന്നില്‍ക്കൂടുതല്‍ പങ്കാളികള്‍ക്കൊപ്പം ലൈംഗിക ആസ്വദിക്കുന്നവര്‍ പലപ്പോഴും വേണ്ട സുരക്ഷാ മാര്‍ഗ്ഗങ്ങള്‍ സ്വീകരിക്കുന്നില്ലെന്നതാണ് ഇതിന് കാരണം. ലൈംഗികജന്യ രോഗങ്ങളെക്കുറിച്ച് പറയുമ്പോള്‍ എയ്ഡ്‌സ എന്ന ഒരൊറ്റച്ചിന്തമാത്രമാണ് പലരിലും.

പലരും എയ്ഡ്‌സ് പോലുള്ള ലൈംഗികരോഗങ്ങളെക്കുറിച്ച് ബോധമുള്ളവരാണ്. പക്ഷേ ആരും അധികം ഓര്‍ക്കാത്ത മറ്റൊരു വില്ലന്‍ ഉണ്ട് സെര്‍വിക്കല്‍ കാന്‍സര്‍. ഒന്നില്‍ക്കൂടുതല്‍ ലൈംഗികപങ്കാളികളുള്ള സ്ത്രീകളിലാണ് സെര്‍വിക്കല്‍ കാന്‍സറിന് സാധ്യത കൂടുതലുള്ളതെന്ന് പല പഠനങ്ങളില്‍ നിന്നും വ്യക്തമായിട്ടുണ്ട്.

25വയസ്സിന് താഴെയുള്ള സ്ത്രീകളില്‍ സെര്‍വിക്കല്‍ കാന്‍സര്‍ പിടിപെടുന്നത് ഇന്ന് സര്‍വ്വസാധാരണമായിട്ടുണ്ട്. മുന്‍ വര്‍ഷങ്ങളെ അപേക്ഷിച്ച് ഇതില്‍ വന്‍ വര്‍ധനയാണുണ്ടായിരിക്കുന്നത്. ലൈംഗികബന്ധത്തിനിടെ പകരുന്ന ഹ്യൂമന്‍ പാപ്പിലോമ വൈറസ് ആണ് സെര്‍വിക്കല്‍ കാന്‍സറിന് ഒരു പ്രധാന കാരണമാകുന്നത്.