സ്വാര്‍ത്ഥനാവാം ഒട്ടൊക്കെ

ജോലിസ്ഥലത്ത്‌ അല്ലെങ്കില്‍ മറ്റെവിടെയെങ്കിലും വെച്ച്‌ തന്നെ ശല്യപ്പെടുത്തുന്ന ഒരാളെപ്പറ്റി സ്‌ത്രീ പറയുമ്പോള്‍ നിങ്ങള്‍ പ്രത്യേക ഭാവമാറ്റമൊന്നും കൂടാതെയാണോ കേട്ടുകൊണ്ടിരിക്കുന്നത്‌.

എങ്കില്‍ സൂക്ഷിയ്‌ക്കുക ഇതില്‍ നിന്നും സ്‌ത്രീ മനസ്സിലാക്കുന്നത്‌ ഒരു പക്ഷേ നിങ്ങള്‍ക്ക്‌ അവളോടുള്ള താല്‌പര്യം കെട്ടുതുടങ്ങിയെന്നായിരിക്കും. അല്ലെങ്കില്‍ അവളുടെ സുരക്ഷിതത്വത്തെക്കുറിച്ച്‌ നിങ്ങള്‍ വ്യാകുലപ്പെടുന്നില്ലെന്നായിരിക്കും.

തന്റെ കാര്യത്തില്‍ പുരുഷന്‍ ഒട്ടൊക്കെ സ്വാര്‍ത്ഥനായിരിക്കണമെന്നാണത്രേ ഓരോ സ്‌ത്രീയും ആഗ്രഹിക്കുന്നത്‌. എന്നാല്‍ ഇത്‌ കൂടിയാലും പ്രശ്‌നം തന്നെ. മറ്റുള്ളവര്‍ തന്നെ നോക്കുന്നത്‌ ഭര്‍ത്താവിന്‌ ഇഷ്ടമില്ലെന്ന്‌ പറയാനാണ്‌ സ്‌ത്രീകള്‍ കൂടുതലും ഇഷ്ടപ്പെടുന്നത്‌, മറിച്ചല്ല.

അവളുടെ വാക്കുകള്‍ തള്ളിക്കളയാറുണ്ടോ

ഒരിക്കലും പുരുഷനെ സംരക്ഷിയ്‌ക്കാന്‍ മാത്രം സ്‌ത്രീ ശക്തയല്ല. പക്ഷേ പലപ്പോഴും പുരുഷന്റെ വ്യക്തിത്വത്തെ സംബന്ധിച്ച അതിനെ മെച്ചപ്പെടുത്താനുതകുന്ന പല നിര്‍ദ്ദേശങ്ങളും സ്‌ത്രീകള്‍ മുന്നോട്ടുവെയ്‌ക്കാറുണ്ട്‌.

വസ്‌ത്രധാരണം, പെരുമാറ്റം തുടങ്ങിയ രീതികളില്‍ വരെ അവര്‍ അഭിപ്രായ പ്രകടനങ്ങള്‍ നടത്താറുണ്ട്‌. മിക്കപ്പോഴും ഇത്‌ അധികാരം സ്ഥാപിക്കാനോ അമ്മചമയാനോ അല്ല നിങ്ങളെ സഹായിക്കുകയെന്ന ഉദ്ദേശം മാത്രമേ അതില്‍ കാണുകയുള്ളു. എന്നാല്‍ മിക്ക പരുഷന്‍മാരും അത്‌ നിസ്സാരമായി തള്ളിക്കളയുന്നു.

പക്ഷേ അവള്‍ നല്‍കുന്ന ഇത്തരം ചെറിയ അഭിപ്രായങ്ങളും നിര്‍ദ്ദേശങ്ങളും പ്രാധാന്യത്തോടെ പരിഗണിയ്‌ക്കുന്ന പുരുഷന്മാരെ സ്‌ത്രീകള്‍ ഇഷ്ടപ്പെടുന്നുവെന്നതില്‍ സംശയമേതുമില്ല.