എന്തിനും ബില്ലു ചോദിയ്‌ക്കുന്ന ഭര്‍ത്താവ്‌

രണ്ട്‌ വര്‍ഷത്തെ വിവാഹജീവിതത്തില്‍ നിന്ന്‌ മോചനം നേടിയതാണ്‌ റിയ. സ്വസ്ഥമായ ഒരു വിവാഹ ജീവിതം ആഗ്രഹിച്ചാണത്രേ റിയ വിവാഹം തീരുമാനിച്ചശേഷം ജോലി ഉപേക്ഷിച്ചത്‌. ജോലികഴിഞ്ഞെത്തുന്ന ഭര്‍ത്താവിന്‌ വേണ്ടതൊക്കെ ചെയ്‌തുകൊടുക്കുന്ന ഒരു ഭാര്യയായി സന്തുഷ്ട ജീവിതം അതായിരുന്നു റിയയുടെ ലക്ഷ്യം.

പക്ഷേ വിവാഹം കഴിഞ്ഞ്‌ ഏതാനും ദിവസം കഴിഞ്ഞപ്പോഴാണ്‌ ജോലി നഷ്ടപ്പെടുത്തിയത്‌ ബുദ്ധിമോശമായെന്ന്‌ റിയയ്‌ക്ക്‌ തോന്നാന്‍ തുടങ്ങിയത്‌. പച്ചക്കറി വാങ്ങിയാലും ബ്യൂട്ടി പാര്‍ലറില്‍ പോയാലും എല്ലാത്തിന്റെയും ബില്ല്‌ ചോദിയ്‌ക്കുന്ന ഭര്‍ത്താവ്‌. ബില്‍ ഇല്ലെന്നു പറഞ്ഞാല്‍ സംശയത്തോടെയുള്ള പെരുമാറ്റം.

വിവാഹം വരെ സ്വന്തമായി പണം സമ്പാദിയ്‌ക്കുകയും അത്‌ സ്വതന്ത്രമായി ചെലവാക്കുകയും ചെയ്യുന്നവളായിരുന്ന ഞാന്‍ . പെട്ടെന്നൊരാള്‍ കണക്കുചോദിയ്‌ക്കുകയും വിശ്വാസക്കുറവ്‌ കാണിയ്‌ക്കുകയും ചെയ്യുമ്പോള്‍ അത്‌ ഉള്‍ക്കൊള്ളാന്‍ കഴിഞ്ഞില്ല. സഹികെട്ടാണ്‌ വിവാഹമോചനം എന്ന തീരുമാനത്തിലെത്തിയത്‌- റിയ വിശദീകരിച്ചു. ഇവിടെയും വില്ലന്‍ റോള്‍ പണത്തിന്‌ തന്നെ.