സീന്‍ ഒന്ന്: പെട്രോള്‍ ബങ്ക്‌

ഓഫീസിലേയ്‌ക്കുള്ള വഴിയേ റോണിത്തും രജനിയും പെട്രോള്‍ ബങ്കിലെത്തുന്നു. വണ്ടിയില്‍ ഇന്ധനം നിറച്ചുകഴിഞ്ഞ്‌ റോണിത്ത്‌ രജനിയോട്‌ അഞ്ഞൂറു രൂപ ആവശ്യപ്പെടുന്നു.

പൊടുന്നനെ രജനിയുടെ നെറ്റി ചുളിയുന്നു പുരികങ്ങള്‍ ചോദ്യചിഹ്നങ്ങളാകുന്നു. കഴിഞ്ഞ രണ്ടുദിവസമായി ഞാനാണ്‌ പെട്രോളിന്‌ കാശ്‌ കൊടുക്കുന്നത്‌. ഇന്നും ഞാന്‍ തന്നെ കൊടുക്കണോ?. എന്തോ ഓര്‍ത്തെടുത്തപോലെ റോണിത്‌ ശരി...ശരി ഞാന്‍ മറന്നിട്ടില്ല. നീയിപ്പോള്‍ പണം താ വൈകീട്ട്‌ വീട്ടിലെത്തി മൂന്നുദിവസത്തേതും കൂടി ഒരുമിച്ചു തരാം.... റോണിത്‌ അക്ഷമനായി.

തുടര്‍ന്ന്‌ മനസ്സില്ലാമനസ്സോടെ ബാഗ്‌ തുറന്ന്‌ രജനി അഞ്ഞൂറു രൂപ നല്‍കുന്നു. പെട്രോള്‍ ബങ്കില്‍ പണം നല്‍കി വണ്ടി വീണ്ടും ഓഫീസിലേയ്‌ക്ക്‌. അടുത്തടുത്തിരുന്ന്‌ സ്വന്തം കയ്യില്‍ നിന്നും ചെലവായതിന്റെ കണക്ക്‌ ഉരുക്കഴിയ്‌ക്കാന്‍ തുടങ്ങുന്നു രണ്ടുപേരും.

ഒന്‍പത്‌ വര്‍ഷമായി വിവാഹ ജീവിതം നയിക്കുന്നവരാണ്‌ റോണിത്തും രജനിയുമെന്ന്‌ വിശ്വസിക്കാന്‍ കഴിയുന്നുണ്ടോ. വിവാഹം കഴിഞ്ഞ്‌ ഒന്‍പത്‌ വര്‍ഷമായെന്ന്‌ മാത്രമല്ല ഇവര്‍ക്ക്‌ എട്ടും നാലും വയസ്സുള്ള രണ്ട്‌ കുട്ടികളുമുണ്ട്‌. ചുരുക്കിപ്പറഞ്ഞാല്‍ സന്തുഷ്ടകുടുംബം!!!!!