ഇരുപത്തി ഏഴാം രാവിന് തയ്യാറാക്കാം നല്ല സ്വാദുള്ള പൂവട

റംസാന്‍ പുണ്യ ദിനങ്ങളുടെ അവസാനത്തെ പ്രധാനപ്പെട്ട ദിവസങ്ങളിലൂടെയാണ് നാം ഇപ്പോള്‍ കടന്നു പോവുന്നത്. അതുകൊണ്ട് തന്നെ ഈ ദിനങ്ങളിലൂടെ ഭക്തിസാന്ദ്രമായിട്ടാണ് ഓരോ ഇസ്ലാം മതവിശ്വാസിയും കടന്ന് പോവുന്നത്. ഈ ദിനത്തില്‍ നാം തയ്യാറാക്കുന്ന ഭക്ഷണങ്ങള്‍ക്കും അത്രയേറെ പ്രാധാന്യം ഉണ്ട്. ഇരുപത്തി ഏഴാം രാവിന് വളരെയധികം പ്രാധാന്യം ഉണ്ട് നോമ്പ് ദിനങ്ങളില്‍. ഈ ദിനത്തില്‍ നമുക്ക് നല്ല സ്വാദിഷ്ഠമായ പൂവട തയ്യാറാക്കാം. എങ്ങനെ ഇത് തയ്യാറാക്കാം എന്ന് നമുക്ക് നോക്കാം.

ആവശ്യമുള്ള ചേരുവകള്‍

അരിപ്പൊടി- വറുത്തെടുത്തത് ഒരു കപ്പ്
തിളച്ച വെള്ളം - ഒരു കപ്പ്
ഉപ്പ് - പാകത്തിന്
ഏലക്ക- ഒരെണ്ണം പൊടിച്ചത്
നെയ്യ് - 2 ടീസ്പൂണ്‍
തേങ്ങ ചിരകിയത് - അരക്കപ്പ്
പഞ്ചസാര - കാല്‍ക്കപ്പ്

തയ്യാറാക്കുന്ന വിധം

അരിപ്പൊടി നല്ലതുപോലെ വറുത്തെടുത്ത് അതിലേക്ക് തിളച്ച വെള്ളം ചേര്‍ത്ത് ഉപ്പും നെയ്യും മിക്‌സ് ചെയ്ത് നല്ലതുപോലെ കുഴച്ചെടുക്കുക. ഇത് അടയുടെ പരുവത്തില്‍ കുഴച്ചെടുത്ത് മാറ്റി വെക്കുക. പിന്നീട് ഇത് ചെറിയ ഉരുളയാക്കി എടുക്കുക. ഈ ഉരുള കയ്യില്‍ വെച്ച് അതിലേക്ക് തേങ്ങയും പഞ്ചസാരയും ഏലക്കയും മിക്‌സ് ചെയ്ത് വെച്ചത് വെക്കുക. ഈ ഉരുള നല്ലതുപോലെ ഉരുട്ടി പിന്നീട് കൈയ്യില്‍ വെച്ച് തന്നെ പരത്തി അരിക് നല്ലതുപോലെ ഒട്ടിച്ചെടുക്കുക. ഇത് ഇഡ്ഡലി തട്ടില്‍ വെച്ച് ആവിയില്‍ വേവിച്ചെടുക്കാവുന്നതാണ്. നല്ല സ്വാദിഷ്ഠമായ പൂവ്വട തയ്യാര്‍.

നോമ്പ് തുറക്കാന്‍ വെജിറ്റബിള്‍ സ്പ്രിംങ് റോള്‍ തയ്യാറാക്കാം

നോമ്പ് തുറയ്ക്ക് ഉന്നക്കായ