വായില്‍ കപ്പലോടിക്കുന്ന റെസിപ്പി, ഹോട്ടലിലെ അതേ സ്വാദില്‍ ഗോബി മഞ്ചൂരിയന്‍ ഡ്രൈ

വെജ് ഹോട്ടലുകളിലെ താരമാണ് ഗോബി മഞ്ചൂരിയന്‍. പേര് കൊണ്ടും ലുക്ക് കൊണ്ടും രുചി കൊണ്ടും ഗോബി മഞ്ചൂരിയനെ വെല്ലാന്‍ വെജില്‍ മാത്രമല്ല, നോണ്‍ വെജില്‍ പോലും ആരുമില്ല. ഗോബി മഞ്ചൂരിയന്‍ ഡ്രൈ ആയി ഉടുത്തൊരുങ്ങി വന്നാല്‍ ചിക്കന്‍-65 വരെ തോറ്റുപോകും. ചപ്പാത്തിയുടെയും ഫ്രൈഡ് റൈസിന്റെയും ന്യൂഡില്‍സിന്റെയും അങ്ങനെ ആരുടെ കൂടെ വേണമെങ്കിലും ഗോബി മഞ്ചൂരിയന്‍ പോകും. ഇനി ആരുമില്ലെങ്കിലും ഗോബി മഞ്ചൂരിയന്‍ വെറുതെയങ്ങനെ കഴിക്കാനും സൂപ്പറാണ്. അപ്പോള്‍ വളരെ എളുപ്പത്തില്‍ തയ്യാറാക്കാവുന്ന ഒരു ഗോബി മഞ്ചൂരിയന്‍ ഡ്രൈയുടെ റെസിപ്പി നോക്കാം.

ചേരുവകള്‍

• *കോളിഫ്‌ളവര്‍- ഒരു ചെറുത്
• *മൈദ- നാല് ടേബിള്‍സ്പൂണ്‍
• *കോണ്‍ഫ്‌ളോര്‍- ഒരു ടേബിള്‍സ്പൂണ്‍
• *മുളക് പൊടി- ഒരു ടീസ്പൂണ്‍
• *ഉപ്പ്
• *കുരുമുളക് പൊടി
• *ഇഞ്ചി അരിഞ്ഞത്- ഒരു ടീസ്പൂണ്‍
• *വെളുത്തുള്ളി അരിഞ്ഞത്- ഒരു ടീസ്പൂണ്‍
• *പച്ചമുളക് അരിഞ്ഞത്-ഒരു ടീസ്പൂണ്‍
• *സവാള അല്ലെങ്കില്‍ സ്പ്രിംഗ് ഓനിയന്‍ നുറുക്കിയത്-ഒരെണ്ണം
• *കാപ്‌സിക്കം നുറുക്കിയത്- രണ്ട് ടേബിള്‍സ്പൂണ്‍
• *സോയസോസ്, ചില്ലിസോസ്, റെഡ് ചില്ലി പേസറ്റ്, വിനാഗിരി
• *പഞ്ചസാര
• *വെളിച്ചെണ്ണ

തയ്യാറാക്കുന്ന വിധം

*കോളിഫ്‌ളവര്‍ വൃത്തിയാക്കി ചെറുതായി അടര്‍ത്തിയെടുക്കുക. ഇത് തിളച്ച വെള്ളത്തിലേക്ക് ഇട്ട് 3-5 മിനിട്ട് വെക്കുക. ശേഷം വെള്ളം പൂര്‍ണ്ണമായും ഊറ്റിക്കളയുക. വേണമെങ്കില്‍ ഒരു ഉണങ്ങിയ തുണിയിലിട്ട് നനവ് തീര്‍ത്തും മാറ്റാം.
*ഇനി കോളിഫ്‌ളവര്‍ പൊരിക്കുന്നതിനുള്ള മാവ് തയ്യാറാക്കാം.
ഒരു വലിയ പാത്രത്തില്‍ മൈദയും ഉപ്പും കോണ്‍ഫ്‌ളോറും മുളക് പൊടിയും കുരുമുളക് പൊടിയും ചേര്‍ത്ത് മിക്‌സ് ചെയ്യുക.
*വെള്ളം ചേര്‍ത്ത് ഇത് മാവാക്കിയെടുക്കണം. വെള്ളം അധികമാകുകയോ, കുറഞ്ഞുപോകുകയോ ചെയ്യരുത്. കോളിഫ്‌ളവറില്‍ മാവ് പറ്റിപ്പിടിക്കുന്ന രീതിയിലാകണം.
*ഇനി കോളിഫ്‌ളവര്‍ കഷ്ണങ്ങള്‍ മാവിലേക്ക് ഇട്ട് നന്നായി മിക്‌സ് ചെയ്യുക.
അടുപ്പില്‍ ചീനച്ചട്ടി വെച്ച് വെളിച്ചെണ്ണ ഒഴിച്ച് ചൂടാക്കി, ചൂട് പാകമാകുമ്പോള്‍ ഈ കോളിഫ്‌ളവര്‍ മുഴുവന്‍ വറുത്തെടുക്കുക.
*വറുത്തുകോരിയ കോളിഫ്‌ളവര്‍ എണ്ണ ഊറാനായി ഒരു കിച്ചണ്‍ ടിഷ്യൂവിലേക്ക് മാറ്റുക.
*ഇനി മറ്റൊരു പാത്രം അടുപ്പില്‍ വെച്ച് ഒന്നര ടേബിള്‍സ്പൂണ്‍ എണ്ണ ഒഴിച്ച് ചൂടാക്കുക.
അതിലേക്ക് ഇഞ്ചിയും വെളുത്തുള്ളിയും പച്ചമുളകും അരിഞ്ഞത് ചേര്‍ത്ത് 1-2 മിനിട്ട് ഇളക്കുക.
*ശേഷം അരിഞ്ഞുവെച്ചിരിക്കുന്ന സവാളയും കാപ്‌സിക്കവും ചേര്‍ത്ത് 1-2 മിനിട്ട് ഇളക്കി വേവിക്കുക.
*ഇതിലേക്ക് അരടീസ്പൂണ്‍ സോയ സോസ് ചേര്‍ക്കുക.
ശേഷം ഒരു ടേബിള്‍സ്പൂണ്‍ ചില്ലി സോസ്, ചില്ലി പേസ്റ്റ്, ഒരു ടീസ്പൂണ്‍ വിനാഗിരി എന്നിവയും ചേര്‍ത്ത് നല്ലവണ്ണം ഇളക്കി യോജിപ്പിക്കുക. ചില്ലി പേസ്റ്റിനായി മുളക്‌പൊടിയില്‍ അല്‍പ്പം വെള്ളം ചേര്‍ത്ത് പേസ്റ്റ് ആക്കിയാല്‍ മതി. പൊടി നേരിട്ട് ചേര്‍ക്കാതിരിക്കുക.
*ഇതിലേക്ക് ഒരു ടീസ്പൂണ്‍ പഞ്ചസാര ചേര്‍ക്കുക.
*മിക്‌സ് ചെയ്തതിന് ശേഷം മൂന്ന് ടേബിള്‍സ്പൂണ്‍ വെള്ളം കൂടി ചേര്‍ക്കുക. ഈ വെള്ളം മസാലയില്‍ പിടിച്ച് നല്ലവണ്ണം വേവുന്നത് വരെ തീ കുറച്ചുവെക്കുക.
സോസ് കട്ടിയായി തുടങ്ങുമ്പോള്‍ തരിയുള്ള കുരുമുളക് പൊടി ചേര്‍ത്ത് തീ ഓഫ് ചെയ്യുക.
*സോസ് മിക്‌സ് രുചിപ്പ് നോക്കി, പുളി, മധുരം, എരിവ് എന്നിവയുടെ പാകം പരിശോധിക്കുക. ആവശ്യമെങ്കില്‍ വിനാഗിരിയും ഉപ്പും, സോസും വീണ്ടും ചേര്‍ത്ത് പാകത്തിലാക്കിയെടുക്കുക.
*വിളമ്പുന്നതിന് മുമ്പായി വറുത്തുവെച്ചിരിക്കുന്ന കോളിഫ്‌ളവര്‍ കൂടി ചേര്‍ത്ത് നല്ലവണ്ണം മിക്‌സ് ചെയ്‌തെടുക്കുക.
*ഗോബി മഞ്ചൂരിയന്‍ ഡ്രൈ തയ്യാര്‍.

Image Credit:Swathi's Recipes