ബ്രെഡും പനീറും ബട്ടറും ചേരും സ്‌പെഷ്യല്‍ റോള്‍

കുട്ടികള്‍ സ്‌കൂളില്‍ നിന്ന് വരുന്ന സമയമാണ് എങ്കില്‍ അവര്‍ക്ക് ഒരു സ്‌നാക് തയ്യാറാക്കി കൊടുക്കാന്‍ പലരും ആഗ്രഹിക്കും. എന്നാല്‍ ഇനി കുട്ടികള്‍ക്ക് ഇഷ്ടപ്പെടുന്ന രീതിയില്‍ നല്ലൊരു കിടിലന്‍ സ്‌നാക്‌സ് തയ്യാറാക്കാവുന്നതാണ്. പലപ്പോഴും കുട്ടികളുടെ രസമുകുളങ്ങളെ ഉണര്‍ത്തുന്ന രീതിയില്‍ നമുക്കൊരു കിടിലന്‍ സ്‌പെഷ്യല്‍ റോള്‍ ഉണ്ടാക്കാം. എങ്ങനെയെന്ന് നോക്കാം.

ആവശ്യമുള്ള ചേരുവകള്‍:
പനീര്‍
കാപ്‌സിക്കം- രണ്ട് സ്പൂണ്‍ പൊടിയായി അരിഞ്ഞത്
കാരറ്റ് - ഒരെണ്ണം അരിഞ്ഞത്
സവാള - ചെറുതായി അരിഞ്ഞത്
വെളുത്തുള്ളി
ഇഞ്ചി പേസ്റ്റ്
മുളക് പൊടി- പാകത്തിന്
തക്കാളി സോസ്
ഉപ്പ്
കുരുമുളക്
ഗരംമസാല
ബ്രഡ്

പനീര്‍ ചെറുതായി ഗ്രേറ്റ് ചെയ്ത ശേഷം അതിലേക്ക് രണ്ട് സ്പൂണ്‍ പൊടിയായി അരിഞ്ഞ കാപ്‌സിക്കം ചേര്‍ത്ത ്കാരറ്റും ഇഞ്ചിയും മിക്‌സ് ചെയ്യുക. ഇതിലേക്ക് അല്‍പം സവാള അരിഞ്ഞതും ചേര്‍ത്ത് അതിലേക്ക് ഇഞ്ചിയും വെളുത്തുള്ളിയും പേസ്റ്റ് രൂപത്തിലാക്കിയതും മിക്‌സ് ചെയ്ത് നല്ലതുപോലെ വഴറ്റിയെടുക്കണം.

പിന്നീട് എരിവിന് ആവശ്യത്തിന് മുളക് പൊടിയും തക്കാളി സോസും മിക്‌സ് ചെയ്ത് കുരുമുളകും അല്‍പം ഗരംമസാലയും കൂടി ചേര്‍ത്ത് നല്ല പരുവത്തില്‍ മിക്‌സ് ചെയ്ത് എടുക്കണം. പിന്നീടാണ് ബ്രെഡ് ഉപയോഗിക്കേണ്ടത്.

അതിനായി ആദ്യം ബ്രെഡ് അതിന്റെ അരികെല്ലാം മുറിച്ച് മാറ്റിയ ശേഷം അതിന് മുകളില്‍ ചപ്പാത്തിക്കോല്‍ കൊണ്ട് പരത്തിയെടുക്കാം. പിന്നീട് ഇതിന് മുകളിലേക്ക് അല്‍പം ടൊമാറ്റോ സോസ് പുരട്ടി അതിലേക്ക് അല്‍പം പനീര്‍ മിക്‌സ് ചേര്‍ത്ത് ഇത് റോള്‍ ചെയ്ത് പാനിലേക്ക് അല്‍പം ബട്ടര്‍ തേച്ച് അതിലേക്ക് ഓരോ റോളും ഇട്ട് മൊരിച്ചെടുക്കാവുന്നതാണ്.