പനീര്‍ ഹണ്ടി തയ്യാറാക്കി നോക്കൂ

പനീര്‍ പാലിന്റെ മറ്റൊരു വകഭേദമാണ്. പലതരം വിഭവങ്ങളും പനീര്‍ ഉപയോഗിച്ചുണ്ടാക്കാം.

ഇന്ത്യന്‍ മസാലകള്‍ ചേര്‍ത്ത് ഒരു പനീര്‍ വിഭവം, പനീര്‍ ഹണ്ടി തയ്യാറാക്കി നേക്കൂ, മണ്‍പാത്രത്തിലാണ് ഇതുണ്ടാക്കേണ്ടതെന്നോര്‍ക്കുക,

പനീര്‍-200 ഗ്രാം
സവാള-2
തക്കാളി-2
തൈര്-1 കപ്പ്
ഇഞ്ചി-വെളുത്തുള്ളി പേസ്റ്റ്-1 ടീസ്പൂണ്‍
പച്ചമുളക്-4
ചുവന്ന മുളക്-2
മുളകുപൊടി-അര ടീസ്പൂണ്‍
ഗരം മസാല-1 ടീസ്പൂണ്‍
വയനയില-1
എണ്ണ
മല്ലിയില
ഉപ്പ്

ഒരു പാനില്‍ എണ്ണ ചൂടാക്കുക. ഇത് ചൂടാകുമ്പോള്‍ പനീര്‍ കഷ്ണങ്ങളിട്ട് അല്‍പനേരം വഴറ്റുക. പനീര്‍ കഷ്ണങ്ങള്‍ മാറ്റി വയ്ക്കാം.

ഈ എണ്ണയിലേക്ക് വയനയില, ചുവന്ന മുളക് എന്നിവയിട്ടു വഴറ്റുക. സവാള ചേര്‍ത്ത് ഇളക്കണം. ഇത് ബ്രൗണ്‍ നിറമാകുമ്പോള്‍ ഇഞ്ചി-വെളുത്തുള്ളി പേസ്റ്റ്, തക്കാളി അരിഞ്ഞത് എ്ന്നിവ ചേര്‍ക്കണം.

ഇത് നല്ലപോലെ ഇളക്കിയ ശേഷം മുളുകുപൊടി, ഉപ്പ്, ഗരം മസാല എന്നിവ ചേര്‍ത്തിളക്കണം. ഇത് അല്‍പനേരം വേവിയ്ക്കുക.

മസാല ഒരു മണ്‍പാത്രം ചൂടാക്കി ഇതിലേക്കു മാറ്റുക. ഇത് ചെറിയ ചൂടില്‍ വേവിയ്ക്കണം. പിന്നീട് തൈരു ചേര്‍്ത്തിളക്കണം. ഇതിലേക്ക് പനീര്‍ കഷ്ണങ്ങള്‍ ചേര്‍ത്തിളക്കുക. ഇത് അല്‍പനേരം വേവിച്ച ശേഷം വാങ്ങി വച്ച് മല്ലിയില ചേര്‍ത്തിളക്കാം.