പനീര്‍ ഇഡ്ഡലി: സ്വാദോടെ കഴിക്കാം എളുപ്പത്തില്‍

അത്താഴവും ബ്രേക്ക്ഫാസ്റ്റും പലരിലും അല്‍പം കണ്‍ഫ്യൂഷന്‍ ഉണ്ടാക്കുന്നതാണ്. എന്നാല്‍ ചില അവസരങ്ങളില്‍ അല്‍പം വ്യത്യസ്തമായ പാചകം പരീക്ഷിച്ചാലോ എ്ന്ന് തോന്നുന്നുണ്ടോ? അത്തരം പാചക പ്രേമികള്‍ക്കാണ് ഇന്നത്തെ റെസിപ്പി. മുട്ടയും പനീറും ചേര്‍ത്തുള്ള ഒരു സൂപ്പര്‍ ഇഡ്ഡലി. ഈ പനീര്‍ മുട്ട ഇഡ്ഡലിക്ക് കറിയൊന്നും വേണ്ട എന്നതാണ് ഇതിന്റെ പ്രത്യേകതയും. അത്താഴത്തിനും ബ്രേക്ക്ഫാസ്റ്റിനും ഒരുപോലെ കഴിക്കാവുന്നത് ആയത് കൊണ്ട് തന്നെ ഈ പനീര്‍ മുട്ട ഇഡ്ഡലിക്ക് പ്രത്യേകിച്ച് കറിയുടെ ആവശ്യമൊന്നും ഇല്ല.

പ്രോട്ടീന്‍ സമ്പുഷ്ടമായത് കൊണ്ട് തന്നെ ഈ ഇഡ്ഡലി ആരോഗ്യത്തിനും പ്രശ്‌നമുണ്ടാക്കുന്നില്ല. കുട്ടികള്‍ക്കും മുതിര്‍ന്നവര്‍ക്കും ഒരുപോലെ ഇഷ്ടപ്പെടുന്നതാണ് പനീര്‍ മുട്ട ഇഡ്ഡലി. പനീര്‍ മുട്ട ഇഡ്ഡലി രാവിലെയും തയ്യാറാക്കി കഴിക്കാം. നല്ല പ്രോട്ടീന്‍ അടങ്ങിയ ഭക്ഷണമാണിത്. എപ്രകാരം പനീര്‍ മുട്ട ഇഡ്ഡലി തയ്യാറാക്കാം എന്ന് നോക്കാം.

ആവശ്യമായ ചേരുവകള്‍:
* ഗ്രേറ്റ് ചെയ്ത പനീര്‍ - 1/2 കപ്പ്
* മുട്ട - 2
* തേങ്ങ ചിരകിയത് - 3 ടീസ്പൂണ്‍
* മഞ്ഞള്‍പ്പൊടി - 1/4 ടീസ്പൂണ്‍
* ഉപ്പ് - ആവശ്യത്തിന്
* എണ്ണ - 1/4 ടേബിള്‍സ്പൂണ്‍
* കടുക് - 1/4 ടീസ്പൂണ്‍
* വലിയ ഉള്ളി - 1 (ചെറുതായി അരിഞ്ഞത്)
* പച്ചമുളക് - 1 (ചെറുതായി അരിഞ്ഞത്)

തയ്യാറാക്കുന്ന വിധം:
* ആദ്യം ഒരു പാത്രത്തില്‍ മുട്ട പൊട്ടിച്ച് വെച്ച് നല്ലതുപോലെ അടിച്ചെടുക്കുകേ
* ശേഷം അരച്ച പനീര്‍, തേങ്ങ അരച്ചത്, മഞ്ഞള്‍ പൊടി, പാകത്തിന് ഉപ്പ് എന്നിവ ചേര്‍ത്ത് നന്നായി ഇളക്കി ഇഡ്ഡലി മാവിന്റെ പരുവത്തില്‍ ആക്കിയെടുക്കണം
* ശേഷം ഒരു പാന്‍ അടുപ്പില്‍ വെച്ച് അതില്‍ 1/4 ടേബിള്‍സ്പൂണ്‍ എണ്ണ ഒഴിച്ച് ചൂടാകുമ്പോള്‍ കടുക് പൊട്ടിക്കണം.
* അതിന് ശേഷം ഉള്ളി, പച്ചമുളക് എന്നിവ ചേര്‍ത്ത് ആവശ്യത്തിന് ഉപ്പും കലര്‍ത്തി ഒരു മിനിറ്റ് വഴറ്റി സ്വല്‍പം നിറം മാറിയ ശേഷം മുട്ട മിശ്രിതത്തിലേക്ക് ചേര്‍ത്ത് നന്നായി ഇളക്കുക.
* പിന്നീട് ഇഡ്ഡലി പാത്രത്തില്‍ വെള്ളം ഒഴിച്ച് നന്നായി തിളപ്പിക്കുക.
* ശേഷം ഇഡ്ഡലി തട്ടില്‍ എണ്ണ തടവ ഇഡ്ഡലി മാവ് ഒഴിച്ച് ഇഡ്ഡലി പാനില്‍ ഇട്ട് 10 മിനിറ്റ് തിളപ്പിച്ച് തണുപ്പിച്ചാല്‍ സ്വാദിഷ്ടമായ പനീര്‍ മുട്ട ഇഡ്ലി കഴിക്കാവുന്നതാണ്.

Image Courtesy: FoodGood