മേത്തി-ദാല്‍ കറി

ഉലുവയില ഇലക്കറികളില്‍ ഒന്നാണ്. ഇതു നല്‍കുന്ന ആരോഗ്യഗുണങ്ങള്‍ ഏറയാണ്. പരിപ്പും ആരോഗ്യത്തിന് ഏറെ നല്ല ഒന്നു തന്നെയാണ്.

പരിപ്പും ഉലുവയിലയും ഉപയോഗിച്ച് മേത്തി ദാല്‍ കറി ഉണ്ടാക്കി നോക്കൂ.

സാമ്പാര്‍ പരിപ്പ്- അര കപ്പ്
ചെറുപയര്‍ പരിപ്പ്-2 ടേബിള്‍ സ്പൂണ്‍
സവാള-2
തക്കാളി-2
ഉലുവയില-ഒരു കെട്ട്
പച്ചമുളക്-2
ഇഞ്ചി-വെളുത്തുള്ളി പേസ്റ്റ്-1 ടേബിള്‍ സ്പൂണ്‍
ജീരകം-1 ടേബിള്‍ സ്പൂണ്‍
മഞ്ഞള്‍പ്പൊടി-1 ടേബിള്‍ സ്പൂണ്‍
മുളകുപൊടി-അര ടേബിള്‍ സ്പൂണ്‍
വെള്ളം- 2 കപ്പ്
ചെറുനാരങ്ങാനീര്-1 ടേബിള്‍ സ്പൂണ്‍
ഉപ്പ്
എണ്ണ

രണ്ടു തരം പരിപ്പുകളും നല്ലപോലെ കഴുകി അല്‍പസമയം കുതിര്‍ക്കുക. ഇത് ഒരു കപ്പു വെളളമൊഴിച്ച് പ്രഷര്‍ കുക്കറില്‍ വേവിച്ചെടുക്കാം. പരിപ്പ ഉടയാതെ നോക്കണം.

ഉലുവയില തണ്ടില്‍ നിന്നും വേര്‍പെടുത്തി നല്ലപോലെ കഴുകുക. ഇത് ചെറുതായി അരിഞ്ഞെടുക്കണം.

ഒരു പാത്രത്തില്‍ എണ്ണ ചൂടാക്കി ജീരകം പൊട്ടിയ്ക്കുക. ഇതിലേക്ക് പച്ചമുളക്, ഇഞ്ചി വെളുത്തുള്ളി പേസ്റ്റ് എന്നിവ ചേര്‍ക്കാം. ഇത് നല്ലപോലെ ഇളക്കിയ ശേഷം സവാള അരിഞ്ഞതു ചേര്‍ക്കുക. ഇത് ഇളം ബ്രൗണ്‍ നിറമാകുന്നതു വരെ പാകം ചെയ്യണം.

ഈ കൂട്ടിലേക്ക് തക്കാളി അരിഞ്ഞതു ചേര്‍ത്തിളക്കുക. പിന്നീട് അരിഞ്ഞു വച്ച ഉലുവയിലയും ചേര്‍ക്കാം. ഇത് രണ്ടു മിനിറ്റ് നല്ലപോലെ ഇളക്കുക. ഇതിലേക്ക് മസാലപ്പൊടികള്‍, ഉപ്പ്, വേവിച്ചു വച്ച പരിപ്പ് എന്നിവ ചേര്‍ക്കാം. പാകത്തിന് വെള്ളം ചേര്‍ത്ത് വേവിയ്ക്കുക. കറി കുറുകി വരുമ്പോള്‍ വാങ്ങി വച്ച് ചെറുനാരങ്ങാനീര് ചേര്‍ത്ത് ചൂടോടെ ഉപയോഗിക്കാം.