ഓണം സ്‌പെഷ്യല്‍ ഓലന്‍ തയാറാക്കാം

ഓണനാളില്‍ വീടുകളിലെല്ലാം ഓണസദ്യ ഒരുക്കുന്നതിന്റെ തിരക്കായിരിക്കും. തിരുവോണ നാളില്‍ നിരവധി വിഭവങ്ങളുമായി എല്ലാവരും ഒത്തുചേര്‍ന്നിരുന്ന് സ്വാദിഷ്ടസമൃദ്ധമായ സദ്യ കഴിക്കുന്നതിനപ്പുറം ആനന്ദം ഓണക്കാലത്ത് വേറെയില്ല. സദ്യയുടെ പ്രധാന വിഭവങ്ങളില്‍ ഒന്നാണ് ഓലന്‍. മലയാളിയുടെ തനതായ വിഭവമാണ് ഇത്. ഈ ഓണക്കാലത്ത് തിരുവോണ സദ്യയ്ക്ക് സ്വാദേകാന്‍ നമുക്ക് ഒരു സ്പെഷ്യല്‍ ഓലന്‍ തയാറാക്കിയാലോ? ഇതാ, അതിനുള്ള കൂട്ടുകള്‍ ഞങ്ങള്‍ നിങ്ങള്‍ക്കായി പങ്കുവയ്ക്കുന്നു.

ആവശ്യമായ സാധനങ്ങള്‍

കുമ്പളങ്ങ - ഇടത്തരം വലിപ്പമുളളത് - 1
മത്തങ്ങ കഷണങ്ങളാക്കിയത് - 1 കപ്പ്
പച്ചമുളക് - നെടുകെ കീറിയത് 6
തേങ്ങാപ്പാല്‍ - 1 കപ്പ്
വന്‍പയര്‍ - കാല്‍ കപ്പ് (വേവിച്ചത്)
ബീന്‍സ്
കറിവേപ്പില
ഉപ്പ്
വെളിച്ചെണ്ണ - 3 ടീസ്പൂണ്‍

Most read: രുചിയൂറും ചെറുപയര്‍ പരിപ്പ് ഹല്‍വ തയാറാക്കാം

തയ്യാറാക്കുന്ന വിധം

വന്‍പയര്‍ ഉപ്പിട്ടു വേവിച്ച് മാറ്റിവയ്ക്കുക. കഷണങ്ങളാക്കിയ കുമ്പളങ്ങയും മത്തങ്ങയും ബീന്‍സും പച്ചമുളകിട്ട് വേവിക്കുക. പയറും പച്ചക്കറിയും യോജിപ്പിക്കുക.. കറിവേപ്പിലയും ഉപ്പും ഇടുക. തേങ്ങാപ്പാല്‍ ഒഴിക്കുക. നന്നായി ഇളക്കി തിളക്കുന്നതിനു മുമ്പ് ഇറക്കി വയ്ക്കുക. അല്‍പം വെളിച്ചെണ്ണ ഒഴിച്ച് ഇളക്കി മൂടിവയ്ക്കാം. ഓലന്‍ തയാര്‍.