വായിലലിയും മധുര പലഹാരം, മലയാളികള്‍ക്ക് അത്ര പരിചയമില്ലാത്ത റബ്ദി മല്‍പുവ റെസിപ്പി

ഇന്ത്യയിലെ ഏറ്റവും പുരാതനമായ പരമ്പരാഗത മധുരപലഹാരങ്ങളില്‍ ഒന്നായ മല്‍പുവ മലയാളികള്‍ക്ക് അത്ര പരിചയം പോര. പക്ഷേ വടക്കേ ഇന്ത്യയിലും ബംഗ്ലാദേശിലും നേപ്പാളിലും പാക്കിസ്ഥാനിലും എല്ലാം ഈ വിഭവം പ്രസിദ്ധമാണ്. റബ്ദി മല്‍പുവ എന്ന പേര് കേട്ട് ഞെട്ടുകയൊന്നും വേണ്ട. കാരണം ഈ മധുര പലഹാരം ഉണ്ടാക്കാന്‍ വളരെ എളുപ്പമാണ്.

പാന്‍ കേക്കുകള്‍ ഇന്ന് എല്ലാവര്‍ക്കും പരിചിതമാണ്. മല്‍പുവയും പാന്‍ കേക്ക് തന്നെയാണ്. റബ്ദി എന്ന മധുരപാനീയത്തില്‍ ഇട്ടുവെക്കുന്നത് കൊണ്ടാണ് ഇതിനെ റബ്ദി അലുവ എന്ന് വിളിക്കുന്നത്. മൈദയും പഞ്ചസാരയും പാലും ഒക്കെ തന്നെയാണ് പ്രധാന ചേരുവകള്‍ എങ്കിലും ഇവിടെ പാന്‍കേക്ക് നെയ്യിലോ എണ്ണയിലോ വറുത്തെടുക്കുകയാണ് ചെയ്യുന്നത്. അതിന് ശേഷം അത് മധുരപ്പാനിയില്‍ ഇട്ടുവെക്കും. അണ്ടി്പപരിപ്പുകള്‍ക്കൊപ്പമാണ് സാധാരണയായി മല്‍പുവ കഴിക്കുന്നത്.

ചേരുവകള്‍

മല്‍പുവയ്ക്ക്

• മൈദ - ഒരു കപ്പ്
• പാല്‍ - ഒരു കപ്പ്
• പഞ്ചസാര - അരക്കപ്പ്
• ജീരകം - അര ടീസ്പൂണ്‍
• പഴുത്ത ഏത്തയ്ക്ക് - ഒരെണ്ണം
• നെയ്യ്/എണ്ണ - വറുത്തെടുക്കുന്നതിന് ആവശ്യമായത്.

റബ്ദിക്ക്

• പാല്‍ - ഒരു ലിറ്റര്‍
• പഞ്ചസാര - അരക്കപ്പ്
• ഏലയ്ക്കാപ്പൊടി - അര ടീസ്പൂണ്‍

തയ്യാറാക്കുന്ന വിധം

• ഒരു പാത്രത്തില്‍ മൈദ, പാല്‍, പഞ്ചസാര, ജീരകം, പഴം ഉടച്ചത് എന്നിവ ചേര്‍ത്ത് നല്ലവണ്ണം മിക്‌സ് ചെയ്യുക.
• ഒരു പാത്രത്തില്‍ നെയ്് അല്ലെങ്കില്‍ എണ്ണ ഒഴിച്ച് ചൂടാക്കി ഒരു തവി മാവ് അതിലേക്ക് കോരിയൊഴിച്ച് ചെറിയ പാന്‍കേക്കുകള്‍ പൊരിച്ചെടുക്കുക.
• ഇരുവശവും ഗോള്‍ഡന്‍ ബ്രൗണ്‍ ആകാന്‍ ശ്രദ്ധിക്കണം.
• മറ്റൊരു പാത്രത്തില്‍ പാല്‍ ചൂടാക്കി കുറഞ്ഞ തീയില്‍ കുറുക്കിയെടുക്കുക.
• അതിലേക്ക് ഏലയ്ക്കാപ്പൊടി, വേണമങ്കില്‍ രണ്ട് മൂന്ന് കുങ്കുമപ്പൂവിന്റെ അല്ലി എന്നിവ ചേര്‍ത്ത് നന്നായി മിക്‌സ് ചെയ്യുക. കുറുകുമ്പോള്‍ ഓഫാക്കുക.
• ഇനി പൊരിച്ചുവെച്ചിരിക്കുന്ന മല്‍പുവകള്‍ കുറച്ചുമിനിട്ടുകള്‍ ഈ പാനീയത്തില്‍ ഇട്ട് വെക്കുക.
• ശേഷം അണ്ടിപ്പരിപ്പ്, ബദാം പോലുള്ള അണ്ടിപ്പരിപ്പുകള്‍ ചെറുതായി മുറിച്ച് മല്‍പുവയ്ക്ക് ഒപ്പം വെച്ച് വിളമ്പുക.