കാബേജ് കൊണ്ട് ഒരു ക്രിസ്പി വട, കാബേജ് ഉഴുന്നുവട റെസിപ്പി

മിക്കയാളുകളുടെയും പ്രിയപ്പെട്ട സ്‌നാക്‌സ് ആണ് ഉഴുന്നുവട. നല്ല മഴയുള്ള ദിവസം ഉഴുന്നുവടയും ഒപ്പിയെടുത്ത് കഴിക്കാന്‍ കുറച്ച് ചട്‌നിയും ഒരു കട്ടന്‍കാപ്പിയും ഉണ്ടെങ്കില്‍ സംഗതി ജോറാണ്. ഉഴുന്നുവട എത്രയെണ്ണം കഴിച്ചെന്ന കണക്ക് പോലും ഉണ്ടാകില്ല.

ഉഴുന്നുവടില്‍ ഉഴുന്നും പച്ചമുളകും സവാളയും കുരുമുളകും ആണ് പ്രധാന ചേരുവകള്‍. പക്ഷേ അതിനൊപ്പം കുറച്ച് കാബേജ് ചേര്‍ത്താല്‍ കാബേജ് ഉഴുന്നുവട തയ്യാറാക്കാം. ഈ പുതിയ വട എങ്ങനെയാണ് തയ്യാറാക്കുന്നതെന്ന് നോക്കാം.

കാബേജ് ഉഴുന്നുവട - ചേരുവകള്‍

ഉഴുന്ന് പരിപ്പ് - മുക്കാല്‍ കപ്പ്
കാബേജ് കുനുകുനാ അരിഞ്ഞത് - അരക്കപ്പ്
സവാള ചെറുതായി നിുറുക്കിയത്. - കാല്‍ക്കപ്പ്
പച്ചമുളക് -(വട്ടത്തില്‍ അരിഞ്ഞത്
ഇഞ്ചി - ഒരിഞ്ഞ് നീളത്തിലുള്ള ഇഞ്ചി കുനുകുനാന്ന് അരിഞ്ഞത്
കറിവേപ്പില - ഒരു ടേബിള്‍സ്പൂണ്‍
മല്ലിയില- 2 ടേബിള്‍സ്പൂണ്‍ (രണ്ടും ചെറുതായി അരിഞ്ഞത്)
വെളിച്ചെണ്ണ

തയ്യാറാക്കുന്ന വിധം

ഉഴുന്ന് നല്ലവണ്ണം കഴുകി രണ്ടുമണിക്കൂര്‍ കുതിര്‍ത്ത് വെക്കുക. പിന്നീട് വെള്ളം ഊറ്റിക്കളഞ്ഞ് പച്ചമുളക്, ഇഞ്ചി, അരക്കപ്പ് വെള്ളം എന്നിവ ചേര്‍ത്ത് നന്നായി മിക്‌സിയില്‍ അരച്ചെടുക്കുക.

ഈ മാവ് ഒരു പാത്രത്തിലേക്ക് മാറ്റുക. എന്നിട്ട് ഒരു വിസ്‌ക് കൊണ്ടോ, സ്പൂണ്‍ കൊണ്ടോ രണ്ട്, മൂന്ന് മിനിട്ട് നന്നായി അടിച്ച് പതപ്പിച്ച് എടുക്കുക.

ബാക്കിയുള്ള ചേരുവകള്‍ കൂടി ഈ മാവിലേക്ക് ചേര്‍ത്ത്, ആവശ്യത്തിന് ഉപ്പും ചേര്‍ത്ത് നന്നായി ഇളക്കുക.

ഇനി ഒരു പാത്രം അടുപ്പില്‍ വെച്ച് എണ്ണ ഒഴിച്ച് ചൂടാക്കുക.

മാവ് കയ്യില്‍ ഒട്ടിപ്പിടിക്കാതിരിക്കാന്‍ കയ്യില്‍ വെള്ളമാക്കി, കുറച്ച് മാവെടുത്ത് വടയുടെ ആകൃതിയില്‍ പരത്തിയെടുക്കുക.

നല്ലവണ്ണം ചൂടായ എണ്ണയിലേക്ക് പരത്തിയെടുത്ത മാവ് ഇട്ട് ഗോള്‍ഡന്‍ ബ്രൗണ്‍ നിറമാകുന്നത് വരെ വറുത്തുകോരുക. കാബേജ് ഉഴുന്നുവട തയ്യാര്‍.

ഇനി വടയ്‌ക്കൊപ്പം അല്‍പ്പം ചട്‌നി കൂടി അരച്ച് . ചൂട് ചായക്കൊപ്പം ചൂടോടെ വട ആസ്വദിക്കുക.

Image Credit: Wikimedia