ചില ഗര്‍ഭകാല അന്ധവിശ്വാസങ്ങള്‍

പ്ലെയിന്‍ യാത്ര

ഗര്‍ഭിണികള്‍ ഏഴു മാസം കഴിഞ്ഞാല്‍ പ്ലെയിന്‍ യാത്രയരുതെന്നു പറയും. മിക്കവാറും എയര്‍ലൈനുകള്‍ ഇത് അനുവദിക്കുകയുമില്ല. ഏഴാം മാസമായതു കൊണ്ട് പ്രസവസാധ്യത കൂടുതലുണ്ടെന്നതാണ് ഈ വിലക്കിനു കാരണം. അല്ലാതെ പ്ലെയിനില്‍ സഞ്ചരിക്കുന്നത് അമ്മയ്‌ക്കോ കുഞ്ഞിനോ ആരോഗ്യപ്രശ്‌നങ്ങള്‍ ഉണ്ടാക്കില്ല.

പൂച്ച

ഗര്‍ഭിണികള്‍ പൂച്ചകളുമായി സംസര്‍ഗമരുതെന്നു പറയും. ഇവയുടെ വിസര്‍ജ്യത്തിലൂടെ ടോക്‌സോപ്ലാസ്‌മോസിസ് എന്ന രോഗത്തിനു സാധ്യത കൂടുതലാണ്. അല്ലാതെ പൂച്ചകള്‍ ഗര്‍ഭിണികള്‍ക്ക് മറ്റു പ്രശ്‌നങ്ങള്‍ വരുത്തില്ല.

കമഴ്ന്നു കിടന്നാല്‍

ഗര്‍ഭിണികള്‍ കമഴ്ന്നു കിടന്നാല്‍ കുഞ്ഞിന് ശ്വാസം മുട്ടുമെന്ന ധാരണയും തെറ്റു തന്നെ. കുഞ്ഞിനെ ഗര്‍ഭപാത്രത്തിന്റെ ആവരണങ്ങളും അംമ്‌നിയോട്ടിക് ഫഌയിഡുമെല്ലാം സംരക്ഷിയ്ക്കുന്നുണ്ട്. കമഴ്ന്നു കിടന്നുറങ്ങുന്നത് ഗര്‍ഭകാലത്ത് അസൗകര്യമായതു കൊണ്ടാണ് ഇങ്ങനെ പറയുന്നത്.

ആണ്‍കുഞ്ഞോ പെണ്‍കുഞ്ഞോ?

ഗര്‍ഭത്തിലുള്ളത് ആണ്‍കുഞ്ഞോ പെണ്‍കുഞ്ഞോ എന്നു തീരുമാനിക്കാനും സ്‌കാനിംഗല്ലാതെ പലര്‍ക്കും വഴികളുണ്ട്. വയര്‍ മുകളിലേക്കാണെ്ങ്കില്‍ പെണ്‍കുഞ്ഞും താഴേയ്ക്കാണെങ്കില്‍ പെണ്‍കുഞ്ഞുമെന്നതാണ് വിശ്വാസം. ഇതുപോലെ ഗര്‍ഭകാലത്ത് അമ്മ ഭംഗി വയ്ക്കുകയാണെങ്കില്‍ പെണ്‍കുഞ്ഞായിരിക്കുമെന്നും അല്ലെങ്കില്‍ ആണ്‍കുഞ്ഞായിരിക്കുമെന്നും പറയും. ഇവയെല്ലാം വെറും വിശ്വാസങ്ങള്‍ മാത്രം. ഇവയ്ക്ക് യാതൊരു ശാസ്ത്രീയസത്യങ്ങളുമില്ല.

നെഞ്ചെരിച്ചിലുണ്ടായാല്‍

ഗര്‍ഭകാലത്ത് അമ്മയ്ക്ക് കൂടുതല്‍ നെഞ്ചെരിച്ചിലുണ്ടായാല്‍ ജനിയ്ക്കുന്ന കുഞ്ഞിന് ധാരാളം മുടിയും രോമങ്ങളുമുണ്ടായിരിക്കുമെന്നു ചില സ്ഥലങ്ങളില്‍ വിശ്വാസമുണ്ട്. ഇതും സത്യമല്ല.

പൊക്കിള്‍ക്കൊടി

ഗര്‍ഭിണി കൈകള്‍ തലയ്ക്കു മുകളില്‍ ഉയര്‍ത്തിപ്പിടിച്ചാല്‍ പൊക്കിള്‍ക്കൊടി കുഞ്ഞിന്റെ കഴുത്തിനു ചുറ്റും പിണയുമെന്നും മിഥ്യാധാരണയുണ്ട്.

വ്യായാമങ്ങള്‍

ഗര്‍ഭകാലത്ത് വ്യായാമങ്ങള്‍ പാടില്ലെന്നും ചിലരെങ്കിലും കരുതുന്നു. ഇത് തികച്ചും തെറ്റാണ്. ഗര്‍ഭകാല അസ്വസ്ഥതകള്‍ മാറാനും പ്രസവം സുഖകരമാക്കാനും ശരീരം അമിതമായി തടിക്കാതിരിക്കാനുമെല്ലാം ഇത് നല്ലതാണ്.