ഗര്‍ഭിണിയാകാന്‍ ഭയം വേണ്ട

ശരീരസൗന്ദര്യവും രൂപഭംഗിയും നഷ്ടപ്പെടുമോയെന്ന ഭയം ചില സ്ത്രീകളെ ഉത്തരം തീരുമാനത്തിന് പ്രേരിപ്പിക്കാറുണ്ട്. എന്നാല്‍ ഇതില്‍ വാസ്തവമില്ല. പ്രസവശേഷം വ്യായാമവും ഭക്ഷണക്രമവും ശരിയായി പാലിച്ചാല്‍ സൗന്ദര്യത്തിന് ഒരു കുറവും വരില്ല.

പ്രസവവേദന ചില സ്ത്രീകളില്‍ ഭയപ്പാടുണ്ടാക്കും. എന്നാല്‍ ഇതൊരു ശാരീരിക പ്രക്രിയ മാത്രമാണെന്ന് മനസിലാക്കുകയാണ് വേണ്ടത്. ഭയം നല്‍കുന്ന സംഭാഷണങ്ങളും ചിത്രങ്ങളും അകറ്റി നിര്‍ത്തുക. ഏതൊരു സ്ത്രീയും കടന്നു പോകുന്ന പ്രക്രിയയാണിതെന്ന് മനസിലാക്കുക. മാത്രമല്ലാ, ആധുനിക വൈദ്യശാസ്ത്രത്തില്‍ വേദനയില്ലാതെ തന്നെ പ്രസവിക്കാനുള്ള വഴികളുമുണ്ട്.

ഇത്തരം ഭയം അകറ്റുന്ന കാര്യത്തില്‍ ഭര്‍ത്താവിനും കുടുംബാംഗങ്ങള്‍ക്കും ഏറെ ചെയ്യാനുണ്ട്. കുഞ്ഞിനെ നോക്കുന്ന ഉത്തരവാദിത്വവും വീട്ടുജോലിയുടെ ഉത്തരവാദിത്വങ്ങളും പങ്കിട്ടെടുക്കുന്നതും ഗര്‍ഭാവസ്ഥയില്‍ സ്ത്രീക്ക് കരുതലും മാനസിക പിന്തുണയും നല്‍കുന്നത് ഇത്തരം ഭയത്തെ ഒഴിവാക്കും. ഗര്‍ഭിണിയായ സ്ത്രീക്ക് എല്ലാ കാര്യങ്ങളിലും കൂടുതല്‍ ശ്രദ്ധ കൊടുക്കുക. കുഞ്ഞിന്റെ പ്രാധാന്യത്തെ കുറിച്ച് തിരിച്ചറിയാന്‍ ഇത് സഹായിക്കും.

കുഞ്ഞുങ്ങളുടെ ഫോട്ടോകള്‍ കാണാവുന്ന വിധത്തില്‍ വയ്ക്കുന്നതും കുഞ്ഞുങ്ങളെപ്പറ്റിയുള്ള സിനിമയോ ടിവി പരിപാടികളോ കാണുന്നതും സ്ത്രീകളില്‍ ഭയത്തിന് പകരം വാല്‍സല്യം നിറയ്ക്കും.

അമ്മയാകാനൊരുങ്ങുന്നത് ജീവിതത്തിലെ ഏറ്റവും സുന്ദരവും സന്തോഷകരവുമായ കാലമാക്കി മാറ്റുക.