പാരമ്പര്യരോഗം ഗര്‍ഭധാരണത്തിന് അപകടം

ഹൈപ്പോതൈറോയ്ഡ് പ്രശ്‌നങ്ങളുള്ളവര്‍ ഗര്‍ഭം ധരിക്കുന്നത് റിസ്‌കാണെന്നു തന്നെ പറയാം. ഇത്തരം സ്ത്രീകളില്‍ ഓവുലേഷന്‍ പ്രശ്‌നങ്ങള്‍ കാരണം ഗര്‍ഭധാരണം തന്നെ ബുദ്ധിമുട്ടാണ്. പുരുഷന്മാരില്‍ ഹൈപ്പോതൈറോയ്ഡ് വന്ധ്യതക്കു കാരണമാവുകയും ചെയ്യും. ഈ പ്രശ്‌നങ്ങളുള്ള സ്ത്രീകള്‍ ഗര്‍ഭം ധരിച്ചാല്‍ കുഞ്ഞിന് ന്യുറോളജിക്കള്‍ പ്രശ്‌നങ്ങളുണ്ടാകാനുള്ള സാധ്യത കൂടുതലാണ്.

പ്രമേഹരോഗമുള്ളവര്‍ ഗര്‍ഭം ധരിക്കുന്നതിന് മുന്‍പ് പഞ്ചസാരയുടെ തോത് സാധാരണ ഗതിയിലാക്കണം. അല്ലാത്തപക്ഷം കുഞ്ഞിന് ശാരീരികവൈകല്യങ്ങളുണ്ടാകാനും തൂക്കക്കുറവ്, മാസം തികയാതെയുള്ള പ്രസവം തുടങ്ങിയ പ്രശ്‌നങ്ങളുണ്ടാകാനുള്ള സാധ്യതയുമുണ്ട്.

ഹീമോഫീലിയ ഉള്ള രോഗികള്‍ ഈ അവസ്ഥ ചികിത്സിച്ച ശേഷം മാത്രമെ ഗര്‍ഭം ധരിക്കാവൂ. രക്തം കട്ടപിടിക്കാതിരിക്കുന്ന അവസ്ഥയാണ് ഹീമോഫീലിയ. ഈ അവസ്ഥയുള്ളവരില്‍ പ്രസവം ചിലപ്പോള്‍ നിര്‍ത്താതെയുള്ള ബ്ലീഡിംഗിന് ഇട വരുത്തും. ഇത് അമ്മയ്ക്ക് അപകടമാണ്. ഹീമോഫീലിയ ജീന്‍ പ്രശ്‌നത്തെ തുടര്‍ന്നുണ്ടാകുന്ന രോഗമായതു കൊണ്ട് കുഞ്ഞിനും വരാനുള്ള സാധ്യതയുമുണ്ട്.

പാരമ്പര്യരോഗങ്ങളുള്ളവര്‍ ഡോക്ടറുടെ നിര്‍ദേശപ്രകാരം മാത്രമെ ഗര്‍ഭം ധരിക്കാന്‍ പാടുള്ളൂ. അല്ലെങ്കില്‍ കുഞ്ഞിനും ഇത്തരം രോഗങ്ങള്‍ വരാനുള്ള സാധ്യത കൂടുതലാണ്. ഗര്‍ഭം ധരിക്കുന്നതിന് മുന്‍പ് ആവശ്യമായ ടെസ്റ്റുകള്‍ നടത്തി പ്രശ്‌നപരിഹാരം തേടണം.

മുന്‍പ് ഗര്‍ഭിണിയായപ്പോള്‍ അപകടകരമായ പ്രശ്‌നങ്ങളുണ്ടായവര്‍ വീണ്ടും ഗര്‍ഭം ധരിക്കുന്നത് ഒഴിവാക്കുന്നതാണ് നല്ലത്. ഹൈ റിസ്‌ക് പ്രഗ്നന്‍സി എന്നാണ് ഇതിനെ പറയാറ്.

ആദ്യത്തെ കുട്ടിക്ക് സെറിബ്രല്‍ പാര്‍സി, ബുദ്ധിമാന്ദ്യം എന്നിങ്ങനെയുള്ള പ്രശ്‌നങ്ങളുണ്ടെങ്കില്‍ വീണ്ടും ഗര്‍ഭധാരണം ഒഴിവാക്കുന്നതാണ് നല്ലത്. ഇത് ഒരു ജെനറ്റിക് പ്രശ്‌നമാണെങ്കില്‍ രണ്ടാമത്തെ കുഞ്ഞിനും ഇതുണ്ടാകാനുള്ള സാധ്യത കൂടുതലാണ്.

ഇത്തരം പ്രശ്‌നങ്ങളുള്ളവര്‍ ഗര്‍ഭധാരണത്തിന് മുന്‍പ് ആവശ്യമായ മുന്‍കരുതലുകളെടുക്കുകയോ ഗര്‍ഭധാരണം ഒഴിവാക്കുകയോ ചെയ്യണം.