ഗര്‍ഭിണികളും യോനീസ്രവവും

Published: Tuesday, March 27, 2012, 11:54 [IST]

ഗര്‍ഭിണിയായ സ്ത്രീയുടെ ശരീരത്തില്‍ പലവിധ ഹോണ്‍മോണ്‍ മാറ്റങ്ങളും നടക്കുന്നുണ്ട്. ഇത് ചിലപ്പോള്‍ സ്രവങ്ങളായി ശരീരത്തില്‍ നിന്ന് പുറന്തള്ളപ്പെടും. ഗര്‍ഭിണിയുടെ യോനിയില്‍ നിന്ന് വെള്ള നിറത്തില്‍ കട്ടിയുള്ള ഒരു സ്രവം പുറന്തള്ളപ്പെടുന്നത് സാധാരണമാണ്. ഈസ്ട്രജന്റെ അളവ് ശരീരത്തില്‍ കൂടുന്നതാണ് ഇതിന് കാരണം.

സാധാരണ ഗതിയില്‍ ഇത് യോനീനാളത്തെ വൃത്തിയാക്കി വയ്ക്കുവാന്‍ ഉദ്ദേശിച്ചുള്ളതാണ്. ഗര്‍ഭിണിയായിരിക്കെ ആദ്യത്തെ ആറുമാസം ഈ സ്രവം ഉല്‍പാദിപ്പിക്കപ്പെടും. ചിലപ്പോള്‍ രക്തത്തിന്റെ അംശവും ഈ ഡിസ്ചാര്‍ജിനൊപ്പമുണ്ടാകും. സാധാരണഗതിയില്‍ ഇത് ഉത്കണ്ഠപ്പെടേണ്ട ഒരു പ്രശ്‌നമല്ല.

എന്നാല്‍ സ്രവത്തിന്റെ അളവ് കൂടുതലായാല്‍ ഡോക്ടറെ കാണുന്നതാണ് നല്ലത്. ചിലപ്പോള്‍ ഇതിന്റെ നിറം മാറി ഇളംമഞ്ഞ നിറത്തിലോ റോസ് നിറത്തിലോ കണ്ടെന്നിരിക്കാം. ഇതിനൊപ്പം അധികം ദുര്‍ഗന്ധവും യോനിയില്‍ ചൊറിച്ചിലുമുണ്ടെങ്കില്‍ ഇതു മിക്കവാറും അണുബാധ കാരണമാകും. ഇതിന് ചികിത്സ അത്യാവശ്യമാണ്.

ഗര്‍ഭത്തിന്റെ അവസാനത്തെ മൂന്നുമാസങ്ങളില്‍ ഇത്തരം ഡിസ്ചാര്‍ജ് കൂടുകയാണെങ്കിലും ഡോക്ടറെ കാണണം. ഇത് ഒരുപക്ഷേ മാസം തികയാതെയുളള പ്രസവത്തിന്റെ ലക്ഷണം കൂടിയാകാം.

ഗര്‍ഭിണികള്‍ ഇത്തരം ഡിസ്ചാര്‍ജുകളെപ്പറ്റി ബോധവതികളാകണം. ഇതില്‍ എന്തെങ്കിലും നിറംവ്യത്യാസമുണ്ടെങ്കില്‍ ഡോക്ടറെ കാണാന്‍ മടിക്കരുത്. സ്രവത്തോടൊപ്പം അടിവയറില്‍ വേദനയോ രക്തമോ കണ്ടാല്‍ ഡോക്ടറെ കണ്ട് വിവരം പറയണം. ഇത്തരം പ്രശ്‌നങ്ങള്‍ നിസാരമായി തള്ളിക്കളയരുത്.