ഗര്‍ഭകാലവും ഓഫീസ് ജോലിയും

Pre Natal

oi-Saritha

By Veena

Published: Friday, January 6, 2012, 14:21 [IST]

വീട്ടമ്മയായാലും ജോലി ചെയ്യുന്ന സ്ത്രീയായാലും ഗര്‍ഭകാലത്ത് പ്രത്യേക പരിരക്ഷ അത്യാവശ്യമാണ്. അമ്മയുടേയും കുഞ്ഞിന്റെയും ആരോഗ്യത്തിന് ഇത് വളരെ പ്രധാനവുമാണ്. എന്നാല്‍ ഗര്‍ഭാലസ്യത്തിനിടയില്‍ ജോലി ചെയ്യുന്ന സ്ത്രീകള്‍ക്ക് നിരവധി പ്രശ്ങ്ങളുണ്ടാകുവാനും സാധ്യതയുണ്ട്. ജോലിക്കിടെ ആരോഗ്യം അവഗണിക്കുവാനും പാടില്ല. അമ്മയുടേയും കുഞ്ഞിന്റെയും ആരോഗ്യത്തെ ബാധിക്കാതെ തന്നെ ഓഫീസില്‍ പോകുവാനും സാധിക്കും.

ജോലി ചെയ്യുന്ന സ്ത്രീകളുടെ പ്രധാന പ്രശ്‌നം ഭക്ഷണക്രമം പാലിക്കാതിരിക്കുകയെന്നതാണ്. ഓഫീസിലേക്ക് ഓടുന്ന തിരക്കില്‍ പേരിനു മാത്രം പ്രഭാത ഭക്ഷണം കഴിയ്ക്കുന്നവരും ഭക്ഷണം തന്നെ ഉപേക്ഷിക്കുന്നവരുമുണ്ട്. ഗര്‍ഭിണികള്‍ ഒരു കാരണവശാലും ഭക്ഷണം ഉപേക്ഷിക്കതരുത്. എന്തൊക്കെ തിരക്കുകളുണ്ടെങ്കിലും സമയാസമയത്തു തന്നെ ഭക്ഷണം കഴിയ്ക്കുവാന്‍ ശ്രദ്ധിക്കണം. പോഷകങ്ങളടങ്ങിയ ഭക്ഷണം തെരഞ്ഞെടുക്കുകയും വേണം. ഓഫീസിലാണെങ്കിലും ഫലവര്‍ഗങ്ങളും മറ്റും ഇടയ്ക്കിടെ കഴിയ്ക്കാവുന്നതേയുള്ളൂ.

ഓഫീസിലേക്ക് സൗകര്യപ്രദമായ കോട്ടന്‍ വസ്ത്രങ്ങള്‍ തെരഞ്ഞെടുക്കുന്നതായിരിക്കും നല്ലത്. അധികം ഇറുകിയ വസ്ത്രങ്ങളും ജീന്‍സും ഗര്‍ഭകാലത്ത് ഒഴിവാക്കുന്നതാണ് നല്ലത്. ധരിക്കുവാന്‍ സുഖം തോന്നുന്ന വസ്ത്രങ്ങള്‍ തെരഞ്ഞെടുക്കാന്‍ ശ്രദ്ധിക്കണം.

കാലില്‍ നീരു വരുന്നത് ഗര്‍ഭകാലത്ത് സാധാരണമാണ്. ഓഫീസിലിരുന്ന കാലുകള്‍ കീഴ്‌പ്പോട്ടു തൂക്കിയിട്ടിരുന്ന ജോലി ചെയ്യുമ്പോള്‍ നീരും വേദനയും വരാനുള്ള സാധ്യത കൂടുതലാണ്. ഇടയ്ക്കിടെ എഴുന്നേറ്റു നടക്കുന്നതും കാലുകള്‍ മസാജ് ചെയ്യുന്നതും നന്നായിരിക്കും. കാല്‍ ചെറിയ സ്റ്റൂളിലോ മറ്റോ കയറ്റി വയ്ക്കുന്നത് നന്നായിരിക്കും.

ശരിയായ രീതിയില്‍ ഇരുന്നില്ലെങ്കില്‍ പുറംവേദനയും ശരീരവേദനയും വരാനുളള സാധ്യത കൂടുതലാണ്. നടുഭാഗത്ത് തലയിണയോ മറ്റോ വയ്ക്കുന്നത് ആയാസം ഒഴിവാക്കും. വളഞ്ഞിരിക്കാതെ നിവര്‍ന്നരിക്കാന്‍ ശ്രദ്ധിക്കണം.

ഗര്‍ഭകാലത്ത് മനംപിരട്ടല്‍ സാധാരണമാണ്. ഓഫീസിലെ ഇടവേളകളില്‍ സാലഡോ ഫ്രൂട്ട്‌സോ കഴിയ്ക്കുന്നത് വയറ്റില്‍ അസിഡിറ്റി വരാതിരിക്കാനും അതുവഴിയുള്ള മനംപിരട്ടല്‍ ഒഴിവാക്കാനും സഹായിക്കും. ചെറുനാരങ്ങയുടെ നീര് കുടിക്കുന്നതും ഇഞ്ചി വായിലിടുന്നതും മനംപിരട്ടല്‍ കുറയ്ക്കും.

ജോലിത്തിരക്കാണെങ്കിലും ആവശ്യത്തിന് വെള്ളം കുടിയ്ക്കാന്‍ മറക്കരുത്.