ഗര്‍ഭകാലത്ത് ഒഴിവാക്കേണ്ട ജോലികള്‍

ഗര്‍ഭകാലത്ത് വിശ്രമവും ഒപ്പം വ്യായാമവും വേണം. വീട്ടുജോലികള്‍ ചെയ്യുന്നത് പ്രത്യേകിച്ച് ആരോഗ്യപ്രശ്‌നങ്ങളൊന്നുമില്ലെങ്കില്‍ ഗര്‍ഭിണിക്കു പറ്റിയ ഒരു വ്യായാമവുമാണ്. എന്നാല്‍ ഗര്‍ഭകാലത്ത് ഒഴിവാക്കേണ്ട ചില വീട്ടുജോലികളുണ്ട്, ചില കാര്യങ്ങളുണ്ട്.

ഗര്‍ഭകാലത്ത് ഭാരം ഉയര്‍ത്തുന്നത് നല്ലതല്ല. പ്രത്യേകിച്ച് ആദ്യ മൂന്നു മാസങ്ങളില്‍. ഇത് ഗര്‍ഭസ്ഥ ശിശുവിന് ദോഷം ചെയ്യും. മാത്രമല്ല, ഗര്‍ഭിണിയ്ക്ക് നടുവേദന തുടങ്ങിയ പ്രശ്‌നങ്ങള്‍ വരികയും ചെയ്യും. കുട്ടികളെ എടുത്തുയര്‍ത്തുക, ബക്കറ്റിലെ വെള്ളം, സാധനങ്ങള്‍ നിറച്ച സഞ്ചി തുടങ്ങിയവ ഉയര്‍ത്തുക എന്നിവയെല്ലാം ഒഴിവാക്കുക തന്നെ വേണം.

വീട്ടാവശ്യങ്ങള്‍ക്കും വൃത്തിയാക്കുന്നതിനും വിനെഗര്‍, ബേക്കിംഗ് സോഡ തുടങ്ങിയവ ഉപയോഗിക്കുമ്പോഴും ശ്രദ്ധ വേണം. ഇവയിലെ രാസവസ്തുക്കള്‍ ഗര്‍ഭിണിയുടെ ആരോഗ്യത്തിന് ദോഷം ചെയ്യും. ഇവ ഉപയോഗിക്കുമ്പോള്‍ വളരെ ചുരുങ്ങിയ അളവില്‍ മാത്രം ഉപയോഗിക്കുക. കൈകളില്‍ ഗ്ലൗസുപയോഗിക്കണം. കഴിവതും ഇവയില്‍ നിന്നുള്ള ഗന്ധം ശ്വസിക്കാതിരിക്കാനും ശ്രദ്ധിക്കണം.

പൂച്ചയുടെ വിസര്‍ജ്യവസ്തുക്കള്‍ ഗര്‍ഭിണികള്‍ യാതൊരു കാരണവശാലും വൃത്തിയാക്കുകയോ സ്പര്‍ശിക്കുകയോ അരുത്. ഇവയില്‍ ടോക്‌സോപ്ലാസ്‌മോസിസ് എന്ന അസുഖം പരത്തുന്ന ഒരു പാരസൈറ്റുണ്ട്. ഇത് ഗര്‍ഭസ്ഥശിശുവിന് ഏറെ ദോഷം വരുത്തുവയ്ക്കുന്ന ഒന്നാണ്.

സ്റ്റൂള്‍ പോലുള്ള സാധനങ്ങളില്‍ എന്തെങ്കിലും ആവശ്യത്തിനായി കയറി നില്‍ക്കുന്ന ശീലവും ഉപേക്ഷിക്കണം. ഇത് മറിഞ്ഞുവീണ് അപകടസാധ്യതയുണ്ടെന്നതിനാലാണിത്.

ഇവയ്ക്കിടെ കുനിയുന്നതും ഒഴിവാക്കുക. അടിച്ചുവാരാനും തുടയ്ക്കാനും തുണി കഴുകാനുമൊക്കെ എപ്പോഴും കുനിയുന്നത് ദോഷം ചെയ്യും. ഇത് നടുവേദന കൂട്ടാനും വിലക്കവും ഉളുക്കുമുണ്ടാക്കാനും ഗര്‍ഭകാലത്ത് ഇട വരുത്തും.

ഗര്‍ഭണിയുടെ ആരോഗ്യം കുഞ്ഞിന്റെ ആരോഗ്യം കൂടെയാണ് എപ്പോഴും ഓര്‍മ വയ്ക്കുക.