ആര്‍ത്തവ സമയത്തുമുണ്ട് ഗര്‍ഭസാധ്യത

സ്ത്രീയുടെ അണ്ഡവിസര്‍ജന സമയത്ത് ലൈംഗികമായി ബന്ധപ്പെട്ടാലാണ് ഗര്‍ഭധാരണം നടക്കുക. ഒരു മാസത്തില്‍ ഒരു അണ്ഡം മാത്രമെ സ്ത്രീ ശരീരത്തില്‍ ഉല്‍പാദിപ്പിക്കുകയുള്ളൂ. സാധാരണ 28 ദിവസമാണ് ആര്‍ത്തവക്രമം. എന്നാല്‍ ഇതില്‍ കൂടുതലോ കുറവോ ആകാം. കുറവ് ആര്‍ത്തവ ചക്രമുള്ള സ്ത്രീയുടെ ശരീരത്തില്‍ ചിലപ്പോഴൊക്കെ മാസമുറ സമയത്തു തന്നെ അണ്ഡോല്‍പാദത്തിനുള്ള തയ്യാറെടുപ്പുകളും നടക്കുന്നുണ്ട്. പുരുഷബീജം ഈ സമയത്ത് സ്ത്രീ ശരീരത്തില്‍ പ്രവേശിച്ചാല്‍ ഗര്‍ഭധാരണം നടക്കുകയും ചെയ്യും.

അണ്ഡത്തിന്റെ ആയുസ് തീരെ കുറവാണെങ്കിലും ബീജം രണ്ടുമൂന്നു ദിവസം വരെ ജീവനോടിരിക്കും. അതുകൊണ്ട് അണ്ഡോല്‍പാദനത്തിന്റെ രണ്ടോ മൂന്നോ ദിവസം മുന്‍പ് ലൈംഗികമായി ബന്ധപ്പെട്ടാലും ഗര്‍ഭധാരണ സാധ്യതയുണ്ടെന്നര്‍ത്ഥം. ആര്‍ത്തവചക്രം 28 ദിവസത്തില്‍ കുറവായ സ്ത്രീകളില്‍ മാസമുറയാണെങ്കില്‍ ഗര്‍ഭസാധ്യത കൂടുതലാണ്.

ചില സന്ദര്‍ഭങ്ങളില്‍ ഓവുലേഷന്‍ നടന്നില്ലെങ്കിലും മാസമുറ വരികയും ചെയ്യും. ഇത്തരം സന്ദര്‍ഭങ്ങളില്‍ അണ്ഡവിസര്‍ജനത്തിന്റെ സമയം കൃത്യമായി പറയാന്‍ സാധ്യമല്ല. അതുകൊണ്ട് ഗര്‍ഭധാരണ സാധ്യതയും കൂടുതല്‍ തന്നെ.