ഗര്‍ഭകാലത്തെ ചില പ്രശ്‌നങ്ങള്‍

ഗര്‍ഭകാലം പലവിധ മാറ്റങ്ങളുടേയും കാലം കൂടിയാണ്. ശാരീരികവും മാനസികവുമായ പലവിധ മാറ്റങ്ങളുടേയും കാലം. മാറ്റമെന്നു മാത്രം പറഞ്ഞു കൂടാ, പലവിധ പ്രശ്‌നങ്ങളും ഗര്‍ഭകാലത്തുണ്ടാകാന്‍ സാധ്യത കൂടുതല്‍ തന്നെയാണ്. ഇവയില്‍ ചില പ്രശ്‌നങ്ങളെങ്കിലും പുറത്തു പറയാന്‍ മടിക്കുന്നവയായിരിക്കം.

ഗര്‍ഭകാലത്തുണ്ടാകുന്ന വലിയൊരു പ്രശ്‌നമാണ് ഗ്യാസ്. ഹോര്‍മോണ്‍ വ്യത്യാസങ്ങള്‍ കാരണം അമിതമായി ഗ്യാസ് ഉല്‍പാദിപ്പിക്കപ്പെടുകയും ഇത് ദുര്‍ഗന്ധത്തോടെ പുറത്തു പോവുകയും ചെയ്യും. വ്യായാമം, കൃത്യമായ ഭക്ഷണം എന്നിവയാണ് ഇതിനുള്ള പരിഹാരങ്ങള്‍.

ഗര്‍ഭകാലത്ത് നിയന്ത്രണമില്ലാതെ മൂത്രം പോകുന്ന അവസ്ഥ ചില സ്ത്രീകള്‍ക്കുണ്ടാകും. ചുമയ്ക്കുമ്പോഴോ ചിരിയ്ക്കുമ്പോഴോ എല്ലാം ഇതു സംഭവിച്ചെന്നിരിക്കും. ഗര്‍ഭകാലത്ത് ഞരമ്പുകളുടെ ബലം കുറയുന്നതു കൊണ്ടാണിത്.

മാറിടം, മുഖം എന്നിവിടങ്ങളില്‍ ഹോര്‍മോണ്‍ മാറ്റങ്ങള്‍ കാരണം രോമം വളരുന്നത് ചില സ്ത്രീകള്‍ക്കുണ്ടാകുന്ന ഗര്‍ഭകാല പ്രശ്‌നം തന്നെയാണ്. എന്നാല്‍ ഇത്തരം സാഹചര്യങ്ങളില്‍ ലേസര്‍ ട്രീറ്റ്‌മെന്റുകള്‍ ചെയ്യുന്നതോ ഡോക്ടറുടെ നിര്‍ദേശപ്രകാരമല്ലാതെ ക്രീമുകള്‍ തേക്കുന്നതോ നല്ലതല്ല.

ഹോര്‍മോണ്‍ മാറ്റങ്ങള്‍ കാരണം ചര്‍മത്തില്‍ പാടുകള്‍, കുരുക്കള്‍ എന്നിവ ഗര്‍ഭകാലത്ത് സ്ത്രീകളിലുണ്ടാകാറുണ്ട്. ഇതും ചിലരില്‍ മാത്രമേ കണ്ടുവരുന്നുള്ളൂ. മുഖക്കുരു പോലുള്ള പ്രശ്‌നങ്ങള്‍ പ്രസവം കഴിയുമ്പോള്‍ മാറാവുന്നതേയുള്ളൂ. എന്നാല്‍ ചര്‍മത്തിലുണ്ടാകുന്ന പാടുകള്‍ ചിലപ്പോള്‍ നിലനിന്നെന്നു വരും.

ഹെര്‍മറോയ്ഡ്, പൈല്‍സ് തുടങ്ങിയ പ്രശ്്‌നങ്ങളും ഗര്‍ഭകാലത്ത് സ്ത്രീകള്‍ക്കുണ്ടാവുക പതിവാണ്. ഇത്തരം പ്രശ്‌നങ്ങള്‍ മിക്കവാറും പേര്‍ തുറന്നു പറയാന്‍ മടിക്കുന്നവയുമാണ്. എന്നാല്‍ കൃത്യമായ ഭക്ഷണക്രമത്തിലൂടെ ഇത്തരം പ്രശ്‌നങ്ങള്‍ പരിഹരിക്കാവുന്നതേയുള്ളൂ. ധാരാളം വെള്ളം കുടിയ്ക്കുക, നാരുകള്‍ അടങ്ങിയ ഭക്ഷണം കഴിയ്ക്കുക എന്നിവ കൊണ്ട് ഇവ പരിഹരിക്കാം.