വന്ധ്യയ്ക്ക് കാരണമാകും രോഗങ്ങള്‍

Published: Friday, September 28, 2012, 15:58 [IST]

വന്ധ്യത സ്ത്രീയ്ക്കാണെങ്കിലും പുരുഷനാണെങ്കിലും ഉണ്ടാകാം. സ്ത്രീകളിലും പുരുഷന്മാരിലും പൊതുവായ ചില അസുഖങ്ങളും അവസ്ഥകളും വന്ധ്യതയുണ്ടാക്കും. ഇവയെന്തൊക്കെയെന്നു തിരിച്ചറിയൂ.

പോഷകാഹാരക്കുറവ് വന്ധ്യയ്ക്ക് കാരണമാകുന്ന ഒരു അവസ്ഥയാണ്. ശരീരത്തിന് ആവശ്യമുള്ള പോഷകങ്ങള്‍ ലഭിയ്ക്കാതിരിക്കുന്നത് ആരോഗ്യത്തെ മാത്രമല്ല, കുഞ്ഞുണ്ടാകാനുള്ള സാധ്യതയേയും ബാധിയ്ക്കും. ഗര്‍ഭിണി ആവശ്യമായ ഭക്ഷണം കഴിയ്ക്കാതിരിക്കുന്നത് കുഞ്ഞിന്റെ ആരോഗ്യത്തെയും ബാധിയ്ക്കും.

ഹോര്‍മോണ്‍ പ്രശ്‌നങ്ങള്‍ വന്ധ്യതയ്ക്കുള്ള ഒരു കാരണമാണ്. ഇത് സ്ത്രീകളില്‍ ഓവുലേഷനെയും ആര്‍ത്തവചക്രത്തെയും പ്രതികൂലമായി ബാധിയ്ക്കും. ഭക്ഷണവും ഇതിനൊരു കാരണമാണ്. ആവശ്യത്തിനുള്ള വൈറ്റമിനുകളും മറ്റും ലഭിയ്ക്കാതിരുന്നാല്‍ എന്‍ഡോക്രൈന്‍ ഗ്ലാന്റുകള്‍ ഓവുലേഷന്‍ നടക്കാനാവശ്യമായ ഹോര്‍മോണുകള്‍ ഉല്‍പാദിപ്പിക്കില്ല. ഇത് കുട്ടികളില്ലാതിരിക്കാന്‍ ഇട വരുത്തും.

പെട്ടെന്ന് ഭാരം കുറയുന്നതും ഒരു പരിധിയില്‍ വിട്ട് തൂക്കം കുറയുന്നതും ആര്‍ത്തചക്രത്തെയും ഓവുലേഷനെയും ബാധിയ്ക്കും. ഇത് വന്ധ്യതയ്ക്ക് ഇട വരുത്തുകയും ചെയ്യും. പുരുഷന്മാരില്‍ ഇത് ഹോര്‍മോണ്‍ പ്രശ്‌നങ്ങളുണ്ടാക്കുകയും ചെയ്യും.

വിളര്‍ച്ചയും വന്ധ്യത വരുന്നതിനുള്ള ഒരു കാരണമാണ്. രക്തക്കുറവ് ഗര്‍ഭധാരണത്തിനും ഗര്‍ഭം ധരിച്ചാലും കുഞ്ഞിന്റെ ആരോഗ്യത്തെയും ബാധിയ്ക്കും.

സെലിയാക് എന്ന ദഹനേന്ദ്രിയത്തെ ബാധിയ്ക്കുന്ന രോഗം വന്ധ്യതയ്ക്ക് ഇട വരുത്തുന്ന ഒന്നാണ്. തുടര്‍ച്ചയായ വയറിളക്കവും വയറുവേദനയുമാണ് ഈ രോഗത്തിന്റെ ലക്ഷണങ്ങള്‍. ഈ രോഗം ശരീരത്തില്‍ നിന്ന് പോഷകങ്ങള്‍ നഷ്ടപ്പെടുന്നതിന് ഇട വരുത്തും. ഇതുവഴി ഇത് വന്ധ്യതയ്ക്ക് കാരണമാകുകയും ചെയ്യും.