ഗര്‍ഭാലസ്യം ഒഴിവാക്കാം

Pre Natal

oi-Saritha

By Veena

Updated: Monday, September 10, 2012, 12:28 [IST]

ഗര്‍ഭകാലത്ത് ക്ഷീണം പലരേയും അലട്ടുന്ന ഒന്നാണ്. ഗര്‍ഭകാല ആലസ്യം എന്നു വേണമെങ്കില്‍ ഇതിനെ പറയാം. എപ്പോഴും വിശ്രമിക്കുകയെന്നത് ഇതിനുള്ള പരിഹാരവുമാകുന്നില്ല. ഗര്‍ഭകാലത്തെ ക്ഷീണം ഒഴിവാക്കാന്‍ പല മാര്‍ഗങ്ങളുമുണ്ട്.

ഉറക്കം ക്ഷീണം മാറ്റാനുള്ള നല്ലൊരു വഴിയാണ്. നേരത്തെ കിടക്കാന്‍ ശ്രമിക്കുക. നേരം വൈകി കിടന്നാല്‍ ആവശ്യത്തിന് ഉറങ്ങിയാലും ക്ഷീണം മാറിയെന്നു വരില്ല. നേരത്തെ കിടന്ന് നേരത്തെ എഴുന്നേല്‍ക്കുകയെന്നതാണ് ആരോഗ്യത്തിന് കൂടുതല്‍ നല്ലത്.

ഭക്ഷണം അമ്മയുടേയും കുഞ്ഞിന്റെയും ആരോഗ്യത്തിന് മാത്രമല്ലാ, ഗര്‍ഭകാലത്തെ ക്ഷീണം ഒഴിവാക്കാനും പ്രധാനമാണ്. പച്ചക്കറികള്‍, പഴങ്ങള്‍, സൂപ്പുകള്‍, ഫ്രഷ് ജ്യൂസ് എന്നിവ ഭക്ഷണത്തില്‍ ഉള്‍പ്പെടുത്തുക. വറുത്തതും പൊരിച്ചതുമായ ഭക്ഷണങ്ങള്‍ ഒഴിവാക്കണം. അതുപോലെ പെട്ടെന്ന് ദഹിക്കുന്ന വിധത്തിലുള്ള ഭക്ഷണങ്ങള്‍ വേണം തെരഞ്ഞെടുക്കുവാന്‍.

ധാരാളം വെള്ളം കുടിയ്ക്കണം. രക്തപ്രവാഹം വര്‍ദ്ധിക്കാനും ആരോഗ്യത്തിനും ശാരീരിക അസ്വസ്ഥതകള്‍ കുറയുമാവും ഇത് അത്യാവശ്യം. ശരീരം വീര്‍ക്കുക, കാലുകളില്‍ നീര് വരിക എന്നിവ ഒഴിവാക്കാനും ഇത് അത്യാവശ്യമാണ്. ഉപ്പ് കൂടുതല്‍ കഴിയ്ക്കുന്നത് ശരീരത്തില്‍ വെള്ളം കെട്ടിനില്‍ക്കാന്‍ ഇട വരുത്തും. ഉപ്പ് അത്യാവശ്യത്തിന് മാത്രം ഉപയോഗിക്കുക. ശരീരത്തില്‍ അധികമുള്ള ഉപ്പിന്റെ അംശം കളയാനും വെള്ളം കുടിയ്ക്കുന്നത് സഹായിക്കും.

ഗര്‍ഭകാലത്ത് വ്യായാമം ചെയ്യുന്നത് കൂടുതല്‍ ഊര്‍ജം ശരീരത്തിന് ലഭിക്കാന്‍ കാരണമാകും. ഗര്‍ഭിണിയാണെന്നു കരുതി വ്യായാമം ഒഴിവാക്കേണ്ടതില്ല. വ്യായാമം തളര്‍ത്തുമെന്ന ധാരണയും വേണ്ട. ചെയ്യാവുന്ന ലളിത വ്യായാമങ്ങള്‍ ചെയ്യുക.