ഗര്‍ഭകാലത്ത് ചിക്കന്‍ പോക്‌സ് വന്നാല്‍

Pre Natal

oi-Saritha

By Veena

Published: Wednesday, June 27, 2012, 11:01 [IST]

ഗര്‍ഭകാലം മറ്റെന്തിനേക്കാളുമേറെ സൂക്ഷിക്കേണ്ട കാലമാണ്. അണുബാധ വരാന്‍ സാധ്യത കൂടുതലാണെന്നതു തന്നെ കാരണം. ഇത് ചിലപ്പോള്‍ അമ്മയേയും കുഞ്ഞിനേയും ഒരു പോലെ ബാധിച്ചേക്കും.

ഗര്‍ഭകാലത്ത് വന്നാല്‍ പാര്‍ശ്വഫലങ്ങളുണ്ടാക്കാവുന്ന ചില അസുഖങ്ങളുണ്ട്. ഇവയെക്കുറിച്ച് അറിഞ്ഞിരിക്കുന്നതു നല്ലതാണ്.

ചിക്കന്‍പോക്‌സ് ഗര്‍ഭകാലത്തു വന്നാല്‍ ഗര്‍ഭസ്ഥ ശിശുവിന് പല പ്രശ്‌നങ്ങളുമുണ്ടാകാന്‍ സാധ്യത കൂടുതലാണ്. ഇത് ചൂടുകാലത്താണ് കൂടുതല്‍ വരുന്നെതെന്നതു കൊണ്ട് ഈ സമയത്ത് ശരീരം തണുപ്പിക്കാന്‍ പ്രത്യേക ശ്രദ്ധ വയ്ക്കണം. ഗര്‍ഭകാലത്ത് ചിക്കന്‍പോക്‌സ് വന്നാല്‍ കുഞ്ഞിനെ ബാധിക്കാതിരിക്കാന്‍ ഒരു കുത്തിവയ്‌പെടുക്കാറുണ്ട്. ഇത് ചെലവേറിയ കുത്തിവയ്പുമാണ്.

ഹൈപ്പറ്റൈറ്റിസ് ബി ഇതുപോലെ അമ്മയ്ക്കു വന്നാല്‍ കുഞ്ഞിനെയും ബാധിക്കാനിടയുള്ള രോഗമാണ്. ഇൗ രോഗം പരത്തുന്ന വൈറസുകള്‍ രക്തം, ഉമിനീര്, ബീജം എന്നിവയിലൂടെ പകരാന്‍ ഇടയുണ്ട്. കരളിനെ ബാധിക്കുന്ന ഈ രോഗത്തിന്റെ ലക്ഷണം പനിയും വയറുവേദനയും ക്ഷീണവുമൊക്കെയാണ്.

യൂറിനറി ഇന്‍ഫെക്ഷനും ഗര്‍ഭിണിയെ ബാധിക്കാന്‍ വളരെയേറെ സാധ്യതയുള്ളൊരു രോഗമാണ്. ഇത് കിഡ്‌നി പ്രശ്‌നങ്ങളുണ്ടാക്കും. കുഞ്ഞിനെ നേരിട്ടു ബാധിക്കില്ലെങ്കിലും മാസം തികയാതെയുള്ള പ്രസവം, കുഞ്ഞിന് തൂക്കം കുറയുക എന്നിവ ഇതു കാരണമുണ്ടാകാം. മൂത്രമൊഴിക്കുമ്പോള്‍ നീറ്റലും വയറുവേദനയുമെല്ലാം ഈ രോഗത്തിന്റെ ലക്ഷണങ്ങളാണ്.

റുബെല്ല അഥവാ ജര്‍മന്‍ മീസില്‍സ് എന്ന രോഗം കുഞ്ഞിന് പല പ്രശ്‌നങ്ങളുമുണ്ടാക്കും. ഗര്‍ഭിണിയായി ആദ്യത്തെ 11 ആഴ്ചകള്‍ക്കുള്ളിലാണ്് ഈ രോഗം വരുന്നതെങ്കില്‍ അബോര്‍ഷന്‍ സംഭവിക്കാന്‍ സാധ്യത കൂടുതലാണ്. അല്ലെങ്കില്‍ കുഞ്ഞിന് കണ്‍ജെന്‍ഷ്യല്‍ റുബെല്ല സിന്‍ഡ്രോം എന്ന രോഗം വരും. ഗര്‍ഭിണിയാകും മുന്‍പെ ഇതിനെതിരെയുള്ള കുത്തിവയ്‌പെടുക്കുന്നത് ഈ രോഗം തടയാന്‍ സഹായിക്കും.

കുഞ്ഞിന് ഭാവിയില്‍ പല പ്രശ്‌നങ്ങളും വരുത്തുമെന്നതു കൊണ്ടു തന്നെ ഇത്തരം രോഗങ്ങള്‍ വരാതിരിക്കാന്‍ ഗര്‍ഭകാലത്ത് പ്രത്യേകം ശ്രദ്ധിക്കുന്നതു നന്നായിരിക്കും.