ഗര്‍ഭധാരണം പുരുഷനിലും മാറ്റങ്ങള്‍ വരുത്തും

ഗര്‍ഭം സ്ത്രീകളില്‍ മാറ്റങ്ങള്‍ വരുത്തുന്ന പോലെ പുരുഷന്മാരിലും മാറ്റം വരുത്തുന്നുണ്ട്. ശാരീരികമായിട്ടല്ലെന്നു മാത്രം.

ഗര്‍ഭകാലത്ത് പങ്കാളിയോട് പുരുഷന് സ്‌നേഹവും കരുതലും വര്‍ദ്ധിക്കും. സ്വന്തം കുഞ്ഞിനെ വയറ്റില്‍ ചുമക്കുന്നയാള്‍ എന്ന ഒരു പരിഗണനയാണ് ഇതിന് കാരണം. മാത്രമല്ലാ, ഗര്‍ഭകാലത്ത് സ്ത്രീകള്‍ക്കുണ്ടാകുന്ന ഛര്‍ദി, തലചുറ്റല്‍ തുടങ്ങിയ മാനസിക അസ്വസ്ഥതകള്‍ കണ്ട് പുരുഷന് സഹതാപവുമുണ്ടാകും. ഇത്തരം സ്‌നേഹവും സഹതാപവും ഗര്‍ഭിണിയായ സ്ത്രീയെ കൂടുതല്‍ സഹായിക്കുവാനും കരുതലോടെ പെരുമാറുവാനും പുരുഷനെ സഹായിക്കും.

സ്ത്രീകളേക്കാള്‍ ഒരു കുഞ്ഞിനെക്കുറിച്ചുള്ള ഉത്തരവാദിത്വങ്ങളെക്കുറിച്ച്, പ്രത്യേകിച്ച് സാമ്പത്തിക വശങ്ങളെക്കുറിച്ച് കൂടുതല്‍ ചിന്തിക്കുന്നത് പുരുഷനായിരിക്കും. അച്ഛനാകുന്നു എന്ന വാര്‍ത്ത ഉത്തരവാദിത്വബോധം കൂട്ടുമെന്നു വേണമെങ്കില്‍ പറയാം. കുഞ്ഞിന്റെ ഭാവി മുന്‍കൂട്ടി കണ്ട് കാര്യങ്ങള്‍ തീരുമാനിക്കുന്നതിനും പുരുഷന്‍ തയ്യാറാകും.

അപൂര്‍വം ചില പുരുഷന്മാരിലെങ്കിലും ഉത്തരവാദിത്വത്തെ പറ്റിയുള്ള ചിന്തകള്‍ ഡിപ്രഷന്‍ വരെ വരുത്തി വയ്ക്കും. പ്രത്യേകിച്ചും ആഗ്രഹിക്കാതെയാണ് പങ്കാളി ഗര്‍ഭിണിയായതെങ്കില്‍. ഉത്തരവാദിത്വം ഏറ്റെടുക്കാന്‍ തയ്യാറാകാത്ത പുരുഷന്മാരാണ് പൊതുവെ ഇത്തരക്കാര്‍.

ചില പുരുഷന്മാരുണ്ട്, ഡിപ്രഷന്‍ കാരണം അമിതമായി ഭക്ഷണം കഴിയ്ക്കുന്നവര്‍. ഭാര്യ ഗര്‍ഭം ധരിക്കുമ്പോള്‍ ഭര്‍ത്താവ് തടിക്കുന്നതിന്റെ ഒരു കാരണം ഇതു തന്നെയാണ്.

ഗര്‍ഭം ധരിക്കുന്നതു സ്ത്രീയാണെങ്കിലും ഇതു സംബന്ധിച്ച കാര്യങ്ങള്‍ പുസ്തകങ്ങളിലൂടെയും ഇന്റര്‍നെറ്റിലൂടെയും വായിച്ച് വിവരങ്ങളറിഞ്ഞിരിക്കാന്‍ പുരുഷന്മാര്‍ താല്‍പര്യം കാണിക്കും. ഇത്തരം കാര്യങ്ങള്‍ ചിലതെങ്കിലും പ്രാവര്‍ത്തികമാക്കാന്‍ ശ്രമിക്കുകയും ചെയ്യും.

സ്ത്രീക്കു മാത്രമല്ലാ, ഗര്‍ഭധാരണം പുരുഷനും മാറ്റങ്ങള്‍ വരുത്തുമെന്ന് മനസിലായില്ലേ.