ഗര്‍ഭധാരണത്തില്‍ രക്തഗ്രൂപ്പിനും പങ്ക്

Pre Natal

oi-Saritha

By Veena

Published: Wednesday, June 6, 2012, 10:44 [IST]

വിവാഹത്തില്‍ നാള്‍പ്പൊരുത്തം തുടങ്ങിയ പല പൊരുത്തങ്ങളും നോക്കും. എന്നാല്‍ രക്തഗ്രൂപ്പിന്റെ ചേര്‍ച്ച ആരും നോക്കാറില്ല.

വരും തലമുറയ്ക്ക് ആരോഗ്യപ്രശ്‌നങ്ങളുണ്ടാക്കുമെന്നതു കൊണ്ട് വിവാഹത്തിന് മുന്‍പ് രക്തഗ്രൂപ്പുകള്‍ പരിശോധിക്കുന്നത് നല്ലതായിരിക്കും.

ദമ്പതികളില്‍ രണ്ടുപേരും പൊസറ്റീവ് അല്ലെങ്കില്‍ നെഗറ്റീവ് രക്തഗ്രൂപ്പില്‍ പെടുന്നുണ്ടെങ്കില്‍ പ്രശ്‌നമില്ല. നേരെ മറിച്ച് ഒരാള്‍ നെഗറ്റീവും മറ്റേയാള്‍ പൊസറ്റീവും രക്തഗ്രൂപ്പാണെങ്കില്‍ ഗര്‍ഭസ്ഥ ശിശുവിന് ആരോഗ്യപ്രശ്‌നങ്ങളുണ്ടാകാനുള്ള സാധ്യത കൂടുതലാണ്.

അമ്മയുടെ രക്തഗ്രൂപ്പ് പൊസറ്റീവും അച്ഛന്റേത് നെഗറ്റീവും ആണെങ്കില്‍ പ്രശ്‌നമുണ്ടാകില്ല. എന്നാല്‍ അമ്മയുടേത് നെഗറ്റീവ് അച്ഛന്റേത് പൊസറ്റീവ് രക്തഗ്രൂപ്പുമാണെങ്കില്‍ പ്രശ്‌നമുണ്ടാകാന്‍ സാധ്യത കൂടുതലാണ്.

കുഞ്ഞിന്റെ രക്തഗ്രൂപ്പ് നെഗറ്റീവ് തന്നെയാണെങ്കില്‍ പ്രശ്‌നമില്ല. എന്നാല്‍ നെഗറ്റീവ് രക്തഗ്രൂപ്പുള്ള അമ്മയുടെ ആദ്യത്തെ കുഞ്ഞ് അച്ഛനെപ്പോലെ പൊസറ്റീവ് രക്തമുള്ളതാണെങ്കില്‍ പ്രശ്‌നമുണ്ടാകും.

കുഞ്ഞിന്റെ പൊസറ്റീവ് രക്തം അമ്മയുടെ നെഗറ്റീവ് രക്തത്തില്‍ കലരാന്‍ സാധ്യത കൂടും. ഇതിന് ഗര്‍ഭകാലത്തോ പ്രസവസമയത്തോ ആണ് സാധ്യത കൂടുതല്‍. അമ്മയുടെ ശരീരത്തില്‍ ആന്റിബോഡികളുണ്ടാകാന്‍ ഇത് ഇട വരുത്തുന്നു.

ആദ്യത്തെ കുഞ്ഞിന് ഇതു മൂലം പ്രശ്ങ്ങളുണ്ടാകുന്നില്ല. എന്നാല്‍ രണ്ടാമതും ഗര്‍ഭം ധരിക്കുമ്പോള്‍ ഈ ആന്റിബോഡികള്‍ കുഞ്ഞിന്റെ ശരീരത്തിലെ രക്താണുക്കളെ നശിപ്പിക്കും. കുഞ്ഞിന് വിളര്‍ച്ചയുണ്ടാകാനും ചിലപ്പോള്‍ മരണം സംഭവിക്കാനും ഇത് ഇട വരുത്തുകയും ചെയ്യുന്നു. ചില കുഞ്ഞുങ്ങളില്‍ ശാരീരിക, ആരോഗ്യപ്രശ്‌നങ്ങളുണ്ടാകാനും ഇത് വഴിയൊരുക്കും.

ഇത്തരം പ്രശ്‌നം ഒഴിവാക്കാനായി ഇപ്പോള്‍ ആന്റി ഡി എന്ന കുത്തിവയ്പു ലഭ്യമാണ്. അമ്മ നെഗറ്റീവും കുഞ്ഞ് പൊസറ്റീവും രക്തഗ്രൂപ്പോടെയുള്ളവരാണെങ്കില്‍ പ്രസവത്തിന് ശേഷം 72 മണിക്കൂറിനുള്ളില്‍ ഈ കുത്തിവയ്‌പെടുക്കണം.

അമ്മയുടെ രക്തത്തിലെ ദോഷകരമായ ആന്റിബോഡികള്‍ കണ്ടെത്താന്‍ കൂമ്പ്‌സ് ടെസ്റ്റ് എന്നൊരു പരിശോധനയും നിലവിലുണ്ട്.