അബോര്‍ഷന്‍ ഒഴിവാക്കാന്‍ ചില വഴികള്‍

Published: Wednesday, March 7, 2012, 15:24 [IST]

സ്ത്രീകളില്‍ ഗര്‍ഭം അലസുന്നത് ഇന്ന് സര്‍വസാധാരണമാണ്. പിരിമുറുക്കം നിറഞ്ഞ ജീവിതസാഹചര്യങ്ങളും പുകവലി ശീലവും ഇതിന് പ്രധാന കാരണങ്ങളാണ്. കിഡ്‌നി തകരാറുകള്‍ കാരണവും പ്ലാസന്റയിലെ പ്രശ്‌നങ്ങളും ഗര്‍ഭം അലസിപ്പോകുന്നതിന് വഴി വയ്ക്കുന്നു. ഒരു സ്ത്രീക്ക് മാനസികമായും ശാരീരികമായും ബുദ്ധിമുട്ടാക്കുന്ന ഒന്നാണ് ഗര്‍ഭം അലസുക എന്നത്. അല്‍പമൊന്നു ശ്രദ്ധിച്ചാല്‍ ഈ പ്രശ്‌നം ഒഴിവാക്കാവുന്നതേയുളളു.

35 വയസിനു മുന്‍പ് ഗര്‍ഭിണിയാകുന്നതാണ് അമ്മയുടേയും കുഞ്ഞിന്റേയും ആരോഗ്യത്തിന് നല്ലത്. പുകവലി, മദ്യം, മയക്കുമരുന്നുകള്‍, അമിതമായ കാപ്പികുടി, അമിതവണ്ണം എന്നിവയും ഗര്‍ഭം അലസുന്നതിന് കാരണമാകാറുണ്ട്. ഗര്‍ഭിണി ഇവയെല്ലാം പാടെ ഉപേക്ഷിക്കുക.

ഗര്‍ഭിണിയായ ഉടനെ ഡോക്ടറെ കാണുക. ഗര്‍ഭമലസാനുളള സാധ്യതയുണ്ടെങ്കില്‍ ഡോക്ടര്‍ വിശ്രമിക്കാന്‍ ആവശ്യപ്പെടുകയും ആവശ്യമുള്ള മരുന്നുകള്‍ തരികയും ചെയ്യും. സെക്‌സും വ്യായാമവും ഇത്തരം സന്ദര്‍ഭങ്ങളില്‍ ഒഴിവാക്കുന്നതാണ് നല്ലത്.

ഫോളിക് ആസിഡ്, ധാതുക്കള്‍ എന്നിവയടങ്ങിയ ഗുളികകള്‍ ഗര്‍ഭിണികള്‍ക്ക് നല്ലതാണ്. ഇവ ഡോക്ടറുടെ നിര്‍ദേശപ്രകാരം മാത്രം കഴിക്കുക.

ഗര്‍ഭപാത്രം ചുരുങ്ങുന്നതും സെര്‍വികല്‍ പ്രശ്‌നങ്ങളും ഗര്‍ഭം അലസുന്നതിന് കാരണമാകാറുണ്ട്. ഇവയ്ക്കുള്ള പരിഹാരം ഡോക്ടര്‍ക്ക് നിര്‍ദേശിക്കാനാകും. ചില പച്ചമരുന്നുകളും ഹോമിയോപ്പതി ചികിത്സാരീതിയും ഈ പ്രശ്‌നങ്ങള്‍ക്കുള്ള പരിഹാരമാണ്.

ആവശ്യമായ പോഷകങ്ങള്‍ അടങ്ങിയ ഭക്ഷണം കഴിയ്ക്കുക, കാല്‍സ്യവും പ്രോട്ടീനും കലര്‍ന്ന ഭക്ഷണം കഴിയ്ക്കുക, ലഘുവ്യായാമങ്ങള്‍ ചെയ്യുക എന്നിവ ആരോഗ്യകരമായ ഗര്‍ഭത്തിനുള്ള മാര്‍ഗങ്ങളാണ്.