നോര്‍മല്‍ പ്രസവത്തിന് ചില വഴികള്‍

ചില പ്രശ്‌നഘട്ടങ്ങളില്‍ സിസേറിയന്‍ കൂടിയേ തീരൂ. എന്നാല്‍ ഇത്തരം പ്രശ്‌നങ്ങളൊന്നുമില്ലാത്തവര്‍ക്ക് സാധാരണ പ്രസവം ഉറപ്പു വരുത്താന്‍ ചില മാര്‍ഗങ്ങളുമുണ്ട്.

പ്രസവിക്കണമെങ്കിലും നല്ല ആരോഗ്യം കൂടിയേ തീരൂ. അതുകൊണ്ടു തന്നെ ഭക്ഷണം പ്രധാനം. ഭക്ഷണം കഴിച്ചാല്‍ മാത്രം പോരാ, നല്ല ഭക്ഷണം തെരഞ്ഞെടുത്തു കഴിയ്ക്കണം. കണ്ടതെല്ലാം വലിച്ചുവാരി കഴിച്ചാല്‍ തടി കൂടുമെന്നല്ലാതെ ആരോഗ്യമുണ്ടാകണമെന്നില്ല. ഭക്ഷണകാര്യത്തില്‍ ഡോക്ടറുടെ നിര്‍ദേശം അനുസരിക്കുന്നത് നല്ലതായിരിക്കും. ഭക്ഷണത്തിനൊപ്പം ധാരാളം വെള്ളം കുടിയ്‌ക്കേണ്ടതും അത്യാവശ്യം. ഇത് അംമ്‌നിയോട്ടിക് ഫഌയിഡ് ഉണ്ടാകാന്‍ നല്ലതാണ്. കുഞ്ഞിന്റെ ആരോഗ്യത്തിനും നന്ന്.

ഗര്‍ഭം ഒരു രോഗമല്ലെന്ന കാര്യം ഓര്‍ക്കുക. പ്രശ്‌നങ്ങളൊന്നുമില്ലാത്തവര്‍ക്ക് സാധാരണ പോലെ എല്ലാ ജോലികളും ചെയ്യാം. തൂക്കൂകയും തുടയ്ക്കുകയുമെല്ലാം ചെയ്യുന്നത് നോര്‍മല്‍ പ്രസവത്തിനുള്ള സാധ്യത വര്‍ദ്ധിപ്പിക്കും.

ആയാസമില്ലാത്ത വ്യായാമങ്ങള്‍ ഗര്‍ഭിണികള്‍ തീര്‍ച്ചയായും ചെയ്യണം. നടക്കുന്നതു തന്നെ പ്രധാനം. സുഖപ്രസവത്തിനുള്ള വഴിയാണെന്നു മാത്രമല്ലാ, നടുവേദന, മസില്‍ വേദന തുടങ്ങിയ ഗര്‍ഭാസ്വാസ്ഥ്യങ്ങള്‍ ഒഴിവാക്കാനും ഇത് വളരെ നല്ലതാണ്.

പ്രസവത്തിന് മാനസികമായി ഒരുങ്ങേണ്ടത് പ്രധാനം. പ്രസവവേദനയെക്കുറിച്ചുള്ള ഭയം സുഖപ്രസവത്തിന് ഒരുപക്ഷേ തടസം നിന്നേക്കാം. പ്രസവവേദന സഹിക്കാന്‍ മാനസികമായി തയ്യാറെടുത്താന്‍ തന്നെ പകുതി പ്രശ്‌നം തീരും.