ഗര്‍ഭം രണ്ടാം മാസം, ഭക്ഷണക്രമം

Pre Natal

oi-Saritha

By Veena

Published: Monday, February 6, 2012, 10:35 [IST]

ഗര്‍ഭത്തിന്റെ ഓരോ മാസത്തിലും ഗര്‍ഭിണിയിലും ഗര്‍ഭസ്ഥ ശിശുവിലും കാര്യമായ വ്യത്യാസങ്ങള്‍ വരുന്നുണ്ട്. രണ്ടാംമാസം, അതായത് 5-8 വരെയുള്ള സമയം കുഞ്ഞിന്റെ കണ്ണ്, ചെവി, കയ്യ്, കാല്‍ തുടങ്ങിയവ രൂപപ്പെടുന്ന സമയമാണ്. അതനുസരിച്ച് പോഷകഗുണമുള്ള ഭക്ഷണങ്ങള്‍ കഴിയ്‌ക്കേണ്ടതും പ്രധാനം.

എളുപ്പം ദഹിക്കുന്ന ഭക്ഷണങ്ങളാണ് രണ്ടാംമാസം കൂടുതല്‍ നല്ലത്. മിക്കവാറും പേരിലും ആദ്യ രണ്ടുമൂന്നു മാസങ്ങളില്‍ ഛര്‍ദി പതിവായതു കൊണ്ടു കൂടിയാണിത്. മാത്രമല്ലാ, ഗര്‍ഭിണികളില്‍ കുറച്ചു പേരിലെങ്കിലും അസിഡിറ്റി, ഗ്യാസ് തുടങ്ങിയ പ്രശ്‌നങ്ങളും പതിവാണ്. ഇത്തരം പ്രശ്‌നങ്ങള്‍ക്ക് ദഹിക്കാന്‍ എളുപ്പമുള്ള ഭക്ഷണം നല്ലൊരു പരിഹാരമാണ്. ആപ്പിള്‍ ജ്യൂസ്, പഴം, ഇലക്കറികള്‍ എന്നിവ രണ്ടാംമാസത്തില്‍ ഗര്‍ഭിണികള്‍ കഴിച്ചിരിക്കേണ്ട ഭക്ഷണസാധനങ്ങളാണ്.

വിശപ്പും എന്നാല്‍ ഛര്‍ദി കാരണം ഭക്ഷണം കഴിയ്ക്കാന്‍ പറ്റാതിരിക്കുകയോ കഴിച്ചതെല്ലാം ഛര്‍ദിച്ചു പോകുകയോ ചെയ്യുന്ന അവസ്ഥയും പലരിലും കാണാറുണ്ട്. ഉരുളക്കിഴങ്ങ്, അരി, ഗോതമ്പ്, ഓട്‌സ് എന്നിവ വിശപ്പു മാറുവാന്‍ സഹായിക്കുന്ന ഭക്ഷണങ്ങളാണ്. ഇവ ദഹിക്കാനും എളുപ്പമാണ്.

കുഞ്ഞിന്റെ എല്ലുകളുടെ ബലത്തിന് കാല്‍സ്യം അടങ്ങിയ ഭക്ഷണസാധനങ്ങള്‍ വളരെ പ്രധാനമാണ്. പാല്‍, തൈര്, മുട്ട, ചെറിയ ഇനം മത്സ്യങ്ങള്‍ എന്നിവ ഇതിന് സഹായിക്കും. കൊഴുപ്പു കുറഞ്ഞ ഇറച്ചിയും നല്ലതു തന്നെ. എന്നാല്‍ മീന്‍, മുട്ട എന്നിവ നല്ലപോലെ വൃത്തിയാക്കി വേവിച്ചു മാത്രമെ കഴിയ്ക്കാവൂ. അല്ലെങ്കില്‍ അണുബാധ വരാനുള്ള സാധ്യത കൂടുതലാണ്.

പഴവര്‍ഗങ്ങള്‍ നല്ലതാണെങ്കിലും പൈനാപ്പിള്‍, പപ്പായ തുടങ്ങിയവ ഒഴിവാക്കുന്നതാണ് നല്ലത്. ഇവ ചിലപ്പോള്‍ അബോര്‍ഷനു തന്നെ വഴി വച്ചേക്കാം.

ഗര്‍ഭാവസ്ഥയില്‍ മലബന്ധം ഒഴിവാക്കാന്‍ നാരു കലര്‍ന്ന ഭക്ഷണങ്ങള്‍ ഗര്‍ഭിണികള്‍ കഴിയ്ക്കണം. ഇതോടൊപ്പം പഴച്ചാറുകളും വെള്ളവും കുടിയ്ക്കാനും മറക്കരുത്.