ഗര്‍ഭകാലത്തെ ചില ശാരീരിക മാറ്റങ്ങള്‍

എപ്പോഴും മൂത്രശങ്ക തോന്നുന്നത് ഗര്‍ഭകാലത്ത് പതിവാണ്. ആദ്യമാസം മുതല്‍ പ്രസവം വരെയും ഇത് നീണ്ടുനില്‍ക്കുകയും ചെയ്യും. അവസാന മാസമാകുമ്പോഴേക്കും കുട്ടിയുടെ വലിപ്പം കൂടി വരുമ്പോള്‍ മൂത്രശങ്ക അധികരിക്കുകയും ചെയ്യും.

ഗര്‍ഭത്തിന്റെ ആദ്യലക്ഷണം മനംപുരട്ടലും തലചുറ്റലുമാണെന്ന് പറയാം. മിക്കവാറും പേര്‍ ഗര്‍ഭിണിയാണെന്ന് തിരിച്ചറിയുന്നതും ഇത്തരം ലക്ഷണങ്ങള്‍ കൊണ്ടായിരിക്കും. ഗര്‍ഭിണിയായി ആദ്യത്തെ മൂന്നു മാസങ്ങളിലാണ് ഛര്‍ദിയും മനംപിരട്ടലും കൂടുതല്‍ അനുഭവപ്പെടുക. രാവിലെ ഉണര്‍ന്നെഴുന്നേറ്റാലുടനെ മനംപുരട്ടലുണ്ടാകുന്നതു കൊണ്ട് മോണിംഗ് സിക്‌നസ് എന്നൊരു വാക്കുതന്നെ ഗര്‍ഭത്തോടനുബന്ധിച്ചുണ്ടായിട്ടുണ്ട്. സാധാരണയായി ഛര്‍ദിയും മനംപുരട്ടലും ആദ്യ മൂന്നുനാലു മാസങ്ങള്‍ കഴിഞ്ഞാല്‍ മാറും. എന്നാല്‍ പ്രസവം വരെയും ഛര്‍ദിയുണ്ടാകുന്ന ചില സ്ത്രീകളുമുണ്ട്.

ചില പ്രത്യേക ഭക്ഷണങ്ങളോട് ആര്‍ത്തി തോന്നുകയും ഇഷ്ടമുള്ള ചില ഭക്ഷണങ്ങളോട് വെറുപ്പു തോന്നുകയും ചെയ്യുന്ന സമയമാണിത്.

ഗര്‍ഭിണികളില്‍ മുലക്കണ്ണിനു ചുറ്റുമുള്ള ഭാഗം കൂടുതല്‍ ഇരുണ്ട നിറത്തിലാകുകയും ചെയ്യും. സ്തനവലിപ്പത്തിലും ആദ്യമാസം മുതല്‍ വ്യത്യാസങ്ങള്‍ വന്നു തുടങ്ങും.

ഗര്‍ഭിണിയായി ആദ്യമാസം വളരെ ചെറിയ തോതില്‍ രക്തസ്രാവമുണ്ടാകുന്നത് ചില സ്ത്രീകളില്‍ കാണാം. കുത്തുകളായാണ് ഇത്തരം രക്തം കാണപ്പെടുക. ഇവ സാധാരണ രക്തത്തേക്കാളും ഇളംനിറത്തിലായിരിക്കും.

ഇത്തരം ലക്ഷണങ്ങള്‍ ഗര്‍ഭം ഉറപ്പു വരുത്താന്‍ സഹായിക്കുന്നവ കൂടിയാണ്.