പ്രഗ്നന്‍സി ടെസ്റ്റ് പൊസറ്റീവായാല്‍

വീട്ടില്‍ തന്നെ ഗര്‍ഭപരിശോധന നടത്താവുന്ന പ്രഗ്നന്‍സി കിറ്റുകള്‍ ലഭ്യമാണ്. എന്നാല്‍ ഏതെങ്കിലും ഡോക്ടറെ കണ്ട് സംഗതി സത്യമെന്നുറപ്പിക്കുകയാണ് ഏറ്റവും ആദ്യം വേണ്ടത്. ഡോക്ടറുടെ നിര്‍ദേശങ്ങള്‍ തേടുകയും കഴിക്കേണ്ട ഭക്ഷണങ്ങളെയും മരുന്നുകളെയും പറ്റി അറിയണം. ഗര്‍ഭിണികള്‍ക്ക് എടുക്കേണ്ട ചില വാക്‌സിനുകളുമുണ്ട്. ഇതെക്കുറിച്ചും ഡോക്ടറോട് ചോദിക്കാം. ഡോക്ടര്‍ പറഞ്ഞ സമയങ്ങളില്‍ തന്നെ പരിശോധനകള്‍ ചെയ്യുക.

ഡോക്ടറേക്കാളുപരിയായി ആരോഗ്യമുള്ള ഒരു കുഞ്ഞിനു വേണ്ടി ചെയ്യേണ്ടുന്ന കാര്യങ്ങള്‍ സ്വയം മനസിലാക്കിയെടുക്കുക. പോഷകങ്ങളടങ്ങിയ ഭക്ഷണം, വിശ്രമം, വ്യായാമം തുടങ്ങിയ കാര്യങ്ങള്‍ പങ്കാളിയോടൊപ്പമിരുന്ന് തീരുമാനിക്കുക.

ഒരുപക്ഷേ പ്രതീക്ഷിക്കാതെയായിരിക്കം ഗര്‍ഭിണിയാകുന്നത്. അബോര്‍ഷന്‍ എന്നൊരു വഴി മുന്നിലില്ലാത്തിടത്തോളം കാലം കുഞ്ഞിനെ സ്വീകിരിക്കാന്‍ മാനസികമായി ഒരുങ്ങുക. ഉത്തരവാദിത്വങ്ങളുടെ കണക്കു മറന്ന് ഒരു കുഞ്ഞിന്റെ പുഞ്ചിരി സ്വപ്‌നം കണ്ടുതുടങ്ങാം.