ഗര്‍ഭിണികള്‍ സ്വയംചികിത്സ ഒഴിവാക്കുക

Pre Natal

oi-Saritha

By Veena

Published: Wednesday, November 2, 2011, 12:59 [IST]

അമ്മയാകുന്നതാണ് സ്ത്രീത്വം പൂര്‍ണമാക്കുന്നതെന്ന് പറയാറുണ്ട്. കുഞ്ഞുവാവയ്ക്ക് ആകുന്നതും അരുതാത്തതുമായ കാര്യങ്ങളെക്കുറിച്ചായിരിക്കും പിന്നീട് ചിന്ത. കുഞ്ഞിന് ദോഷമുണ്ടാക്കുന്നതെല്ലാം ഒഴിവാക്കുവാന്‍ അവര്‍ ശ്രദ്ധിയ്ക്കും. എന്നാല്‍ ചില കാര്യങ്ങള്‍ വിട്ടുപോകാറുമുണ്ട്. പ്രത്യേകിച്ചും സ്വയം ചികിത്സ. എന്തെങ്കിലും ഒരു വേദന വരുമ്പോഴേയ്ക്കും പെയിന്‍ കില്ലറുകള്‍ വിഴുങ്ങുന്നവരുണ്ട്. കുഞ്ഞിന് ആരോഗ്യമുണ്ടാകട്ടെ എന്നു കരുതി കണ്ണില്‍ കണ്ട വൈറ്റമിന്‍ ഗുളികകള്‍ കഴിയ്ക്കുന്നവരുമുണ്ട്. എന്നാല്‍ നിസാരമെന്ന് കരുതാവുന്ന ഇത്തരം പ്രശ്‌നങ്ങള്‍ ഗുരുതമായ പ്രത്യാഘാതങ്ങള്‍ ഉണ്ടാക്കാം.

കാരണവന്മാര്‍ പറഞ്ഞുതരുന്ന ഒറ്റമൂലികളുണ്ട്. എന്നാല്‍ ഗുണത്തോടൊപ്പം അവ ചിലപ്പോള്‍ ദോഷങ്ങളും വരുത്താം. പ്രത്യേകിച്ച് ഗര്‍ഭത്തിന്റെ ആദ്യത്തെ മൂന്നുമാസം ഏറെ ശ്രദ്ധിക്കണം. ഗര്‍ഭം അലസിപ്പോകുവാന്‍ ഏറ്റവും സാധ്യതയുള്ള സമയമാണിത്. ആദ്യത്തെ മൂന്നുമാസമാണ് കുഞ്ഞിന് അവയവങ്ങള്‍ രൂപപ്പെടുന്നതും തലച്ചോര്‍ വളര്‍ച്ച പ്രാപിക്കുന്നതും. തെറ്റായ ഒരു മരുന്നു മതി ഇതില്‍ പ്രശ്‌നങ്ങള്‍ സൃഷ്ടിക്കാന്‍. കുഞ്ഞുങ്ങളുടെ ജനനേന്ദ്രിയങ്ങള്‍ക്കുണ്ടാകുന്ന പ്രശ്‌നങ്ങള്‍ക്ക് തെറ്റായ മരുന്നുകള്‍ പ്രധാന കാരണമാണ്.

ഗര്‍ഭകാലത്ത് പനിയോ ജലദോഷമോ ഇല്ലാതിരിക്കുന്നത് കുറവാണ്. ഇത്തരം ഘട്ടങ്ങളില്‍ സ്വയം ചികിത്സയ്ക്കു പോകാതെ ഡോക്ടറുടെ ഉപദേശ പ്രകാരം മാത്രം മരുന്നുകള്‍ കഴിയ്ക്കുക. ഡോക്ടര്‍ പറഞ്ഞ ക്രമത്തില്‍ തന്നെ മരുന്നുകള്‍ കഴിയ്ക്കുകയെന്നതും പ്രധാനമാണ്. ഗര്‍ഭിണിയായിരിക്കെ കഴിവതും ഫോളിക് ആസിഡ്, അയേണ്‍ തുടങ്ങിയവയല്ലാതെ മറ്റു മരുന്നുകള്‍ ഒഴിവാക്കുകയായിരിക്കും ബുദ്ധി.

മരുന്നുകള്‍ കൊണ്ട് ഉണ്ടാകുന്ന പ്രശ്‌നങ്ങള്‍ക്ക് കുഞ്ഞ് ജനിച്ച് ഉടനെ ചികിത്സ തേടുന്നതാണ് നല്ലത്. ഇത്തരം പ്രശ്‌നങ്ങള്‍ ഒഴിവാക്കുവാന്‍ സ്വയംചികിത്സ ഒഴിവാക്കുന്നതാണ് നല്ലത്.