ആഘോഷവും ഗര്‍ഭിണിയും ഭക്ഷണവും

ആവശ്യത്തിന് മാത്രം ഗര്‍ഭിണികള്‍ ഭക്ഷണം കഴിയ്ക്കുക. വിശപ്പിനനുസരിച്ച് കുറേശെ ഭക്ഷണം കഴിക്കണം. അമിത ഭക്ഷണം നിങ്ങളുടെ തടി കൂട്ടുകയും ഗര്‍ഭസ്ഥ ശിശുവിന്റെ വളര്‍ച്ച കുറയ്ക്കുകയും ചെയ്യും.

മസാലകളും എണ്ണയും ആവുന്നതും ഒഴിവാക്കി ദഹിക്കാന്‍ എളുപ്പമുള്ള ഭക്ഷണം കഴിയ്ക്കുക. ഉപ്പും മധുരവും നിയന്ത്രിക്കുകയും വേണം.

ഗ്ലൂക്കോസിന്റെ തോത് ഉയരുകയും പ്രമേഹം വരുവാനുള്ള സാധ്യത കൂടുകയും ചെയ്യുന്നത് ഗര്‍ഭകാലത്താണ്. ഇക്കാര്യം ഓര്‍മിക്കുക.

പച്ചക്കറികളും ഫലവര്‍ഗങ്ങളും ഭക്ഷണത്തില്‍ ഉള്‍പ്പെടുത്താം. എന്നാല്‍ പപ്പായ, പൈനാപ്പിള്‍ തുടങ്ങിയ ചില ഫലങ്ങള്‍ ഒഴിവാക്കുക. ഫലങ്ങള്‍ കൊണ്ടും പച്ചക്കറികള്‍ കൊണ്ടും സാലഡുകള്‍ ഉണ്ടാക്കിക്കഴിക്കുന്നത് നല്ലതാണ്.

ഫോളിക് ആസിഡ് ഗര്‍ഭസ്ഥ ശിശുവിന്റെ വളര്‍ച്ചക്ക് അത്യാവശ്യമാണ്. അതുകൊണ്ടുതന്നെ ഇലക്കറികള്‍ ഒഴിവാക്കരുത്. ചീര, ബ്രൊക്കോളി, ബീറ്റ്‌റൂട്ടിന്റെ ഇല, ഉലുവായില, കാബേജ് തുടങ്ങിയവയില്‍ ഒന്ന് ഭക്ഷണത്തില്‍ ഉള്‍പ്പെടുത്തുക.

ഇവയ്‌ക്കൊപ്പം റാഗി, ഗോതമ്പ്, ഓട്‌സ് തുടങ്ങിയ ഭക്ഷണസാധനങ്ങളും ഗര്‍ഭിണിക്ക് അത്യാവശ്യമാണ്.

കാപ്പിയും ശീതളപാനീയങ്ങളും കഴിവതും ഒഴിവാക്കുക. പകരം പാല്‍, ജ്യൂസ്, വെള്ളം എന്നിവ കുടിക്കാം.

ആഘോഷങ്ങള്‍ക്ക് മധുരപലഹാരങ്ങള്‍ പതിവാണ്. ഇവ കഴിക്കുമ്പോള്‍ കൊഴുപ്പു കുറഞ്ഞവ നോക്കി കഴിക്കാന്‍ ശ്രദ്ധിക്കുക.

എന്ത് ആഘോഷങ്ങളാണെങ്കിലും സമയത്ത് ഭക്ഷണം കഴിക്കുവാന്‍ ശ്രദ്ധിക്കുക. അമ്മയുടെ ആരോഗ്യമാണ് ഗര്‍ഭസ്ഥശിശുവിന്റെ ആരോഗ്യം എന്ന് ഓര്‍മ വേണം.