ഗര്‍ഭിണി ഭക്ഷണകാര്യത്തില്‍ വൃത്തി പാലിക്കുക

Pre Natal

oi-Saritha

By Veena

Published: Thursday, November 10, 2011, 10:41 [IST]

ഗര്‍ഭിണിയായിരിക്കെ ശ്രദ്ധിക്കേണ്ട കാര്യങ്ങള്‍ നിരവധി. നടക്കുന്നതും കിടക്കുന്നതും മുതല്‍ ഭക്ഷണകാര്യത്തില്‍ വരെ. നല്ല ഭക്ഷണത്തോടൊപ്പം വൃത്തിയുള്ള ഭക്ഷണം കഴിയ്ക്കുക എന്നതും വളരെ പ്രധാനമാണ്. ഗര്‍ഭിണികളില്‍ രോഗപ്രതിരോധശേഷി കുറവായിരിക്കും. അതുകൊണ്ട് ഭക്ഷ്യവിഷബാധ അടക്കമുള്ള ഇന്‍ഫെക്ഷനുകള്‍ വരാന്‍ സാധ്യത കൂടുതലുമാണ്. ഇത്തരം പ്രശ്‌നങ്ങള്‍ അബോര്‍ഷനിലേക്കും കുഞ്ഞിന്റെ മരണത്തിലേക്കും വരെ വഴി വയ്ക്കും.

ഭക്ഷണം പാകം ചെയ്യാനുപയോഗിക്കുന്ന പാത്രങ്ങള്‍ ചൂടുവെള്ളം ഉപയോഗിച്ച് കഴുകിയ ശേഷം വേണം പാചകം ചെയ്യുവാന്‍. പാചകം ചെയ്യുന്നതിന് മുന്‍പും ഭക്ഷണം കഴിയ്ക്കുമ്പോഴും കയ്യും, പ്രത്യേകിച്ച് നഖങ്ങള്‍ക്കുള്ളിലും വൃത്തിയാക്കണം.

പഴകിയ ഭക്ഷണം ഒഴിവാക്കുക. ഫ്രിഡ്ജില്‍ വച്ചിരുന്നാലും ഭക്ഷണം വീണ്ടും ചൂടാക്കുമ്പോള്‍ അതിന്റെ പോഷകമൂല്യം നഷ്ടപ്പെടുകയാണ് ചെയ്യുന്നത്. ഫ്രിഡ്ജില്‍ ഭക്ഷണം വയ്ക്കുകയാണെങ്കില്‍ ചൂടാക്കാതെ കഴിയ്ക്കരുത്. ഒരു തവണയില്‍ കൂടുതല്‍ ഭക്ഷണം ചൂടാക്കി കഴിക്കുകയുമരുത്.

ഫ്രോസന്‍ ഫുഡുകള്‍ ഫ്രിഡ്ജില്‍ മാത്രം സൂക്ഷിക്കുക. ഇവ പത്തുമിനിറ്റില്‍ കൂടുതല്‍ പുറത്ത് സൂക്ഷിക്കുകയുമരുത്.

പച്ചക്കറികള്‍ വേവിക്കാതെ കഴിയ്ക്കുന്നത് ആരോഗ്യത്തിന് നല്ലതാണെങ്കിലും ഇവയില്‍ രോഗാണുക്കള്‍ ഉണ്ടാകാനുള്ള സാധ്യത കൂടുതലാണ്. അതുകൊണ്ട് വേവിച്ച് കഴിയ്ക്കുന്നതാണ് നല്ലത്. വേവിക്കാതെ കഴിക്കുന്ന പച്ചക്കറികള്‍ കുറേസമയം ഉപ്പും മഞ്ഞള്‍പ്പൊടിയുമിട്ട വെള്ളത്തില്‍ ഇട്ടു വച്ച ശേഷം മാത്രം കഴിയ്ക്കുക.

മത്സ്യം, മുട്ട, ഇറച്ചി എന്നിവ നല്ലപോലെ വേവിച്ചു കഴിയ്ക്കുക. ഇവയില്‍ ബാക്ടീരിയ ഉണ്ടാകാനുള്ള സാധ്യത കൂടുതലാണ്.

ഹോട്ടലുകളില്‍ നിന്നുള്ള ഭക്ഷണം ഒഴിവാക്കുന്നതാണ് ഗര്‍ഭിണികള്‍ക്ക് നല്ലത്.