ഗര്‍ഭകാലത്തെ നടുവേദന കുറയ്ക്കാം

ഗര്‍ഭിണികള്‍ കിടക്കുമ്പോള്‍ എപ്പോഴും വശം തിരിഞ്ഞ് കിടക്കാന്‍ ശ്രദ്ധിക്കുക. ഇടതു വശം തിരിഞ്ഞ് കിടക്കുന്നതാണ് നടുവേദന കുറയുവാനും കുഞ്ഞിന് കൂടുതല്‍ ഓക്‌സിജന്‍ കിട്ടാനും നല്ലത്. കാലുകള്‍ക്കിടയില്‍ തലയിണ വച്ചു കിടക്കുന്നതും നല്ലതാണ്. ഇത് നടുവിന് താങ്ങു നല്‍കും. വയര്‍ കൂടുതല്‍ വലുതാവുമ്പോള്‍ വയറിന് താഴെ തലയിണ വച്ചു കിടക്കുന്നതും നല്ലതു തന്നെ.

നടക്കുമ്പോഴും ഇരിക്കുമ്പോഴും വയര്‍ കാരണം മുന്നിലേക്കായാനുള്ള പ്രവണത സാധാരണയാണ്. ഇത് നടുവേദന വര്‍ദ്ധിപ്പിക്കും. എപ്പോഴും നിവര്‍ന്നിരിക്കാനും നിവര്‍ന്ന് നടക്കുവാനും ശ്രദ്ധിക്കുക. ഇത് നടുവേദന കുറയ്ക്കും.

നീന്തുക, നടക്കുക തുടങ്ങിയ വ്യായാമങ്ങള്‍ നടുവേദന കുറയ്ക്കാന്‍ സഹായിക്കും. ഇത് മസിലുകള്‍ക്ക് അയവ് നല്‍കും. നടുവേദന മാത്രമല്ലാ, കൈ, കാല്‍ മുട്ടുവേദനക്കും ഇത് നല്ലതാണ്. അധികം ആയാസമില്ലാത്ത വീട്ടുജോലികള്‍ ചെയ്യുന്നതും നല്ലതാണ്.

നിലത്തു നിന്നും സാധനങ്ങള്‍ കുനിഞ്ഞെടുക്കുന്നത് ഗര്‍ഭിണിയായിരിക്കെ നടുവേദനയുണ്ടാക്കും. സാധനങ്ങള്‍ എടുക്കണമെങ്കില്‍ ഇരുന്നെടുക്കാന്‍ ശ്രദ്ധിക്കുക. അമ്മയ്ക്കും കുഞ്ഞിനും ഇതാണ് നല്ലത്.

നടുവേദന കുറയ്ക്കുവാന്‍ പ്രെഗ്നന്‍സി ബെല്‍റ്റുകള്‍ നല്ലതാണെന്ന് പറയും. എന്നാല്‍ ഇതു ധരിക്കുന്നത് കുഞ്ഞിന്റെ വളര്‍ച്ചയെ ബാധിക്കുമെന്ന അഭിപ്രായവും നിലവിലുണ്ട്.