30 വയസിനു മേല്‍ ഗര്‍ഭം അപകടമോ?

വൈദ്യശാസ്ത്രമനുസരിച്ച് 30 വയസിന് താഴെ ഗര്‍ഭം ധരിക്കുന്നതാണ് ആരോഗ്യകരമെന്നാണ് അഭിപ്രായം. ഇതിന് അടിസ്ഥാനമായി നിരവധി കാരണങ്ങള്‍ പറയുന്നുമുണ്ട്.

30 വയസിന് ശേഷം സ്ത്രീകള്‍ ഗര്‍ഭം ധരിക്കാനുള്ള സാധ്യത കുറയുന്നുവെന്നാണ് വൈദ്യശാസ്ത്രം പറയുന്നത്. പ്രായം കൂടുന്തോറും സ്ത്രീകളിലെ പ്രത്യുല്‍പാദന ശേഷി കുറഞ്ഞു വരുന്നു.

ബിപിയില്‍ ഉണ്ടാകുന്ന വ്യതിയാനം 30 വയസിനു മീതെയുള്ള ഗര്‍ഭധാരണത്തിന് ദോഷം ചെയ്യുന്നു. പ്രീ ക്ലാംപ്‌സിയ എന്നാണ് ഇത് അറിയപ്പെടുന്നത്. രക്തധമനികളിലൂടെ ശരിയായ വിധത്തില്‍ രക്തം പ്രവഹിക്കാത്ത ഒരു അവസ്ഥയാണിത്. അബോര്‍ഷന്‍, പ്രസവത്തോടെ കുഞ്ഞ് മരിക്കുക, കുഞ്ഞിനുണ്ടാകുന്ന ശാരീരിക, മാനസിക പ്രശ്‌നങ്ങള്‍ എന്നിവയ്ക്ക് രക്തസമ്മര്‍ദത്തിലുണ്ടാകുന്ന വ്യതിയാനം ഇട വരുത്തും. ഗര്‍ഭിണിയുടെ മരണത്തിന് തന്നെ ബിപിയുള്ള വ്യതിയാനം കാരണമായേക്കാം.

വൈകി ഗര്‍ഭം ധരിക്കുന്ന സ്ത്രീകളില്‍ ഗര്‍ഭാവസ്ഥയില്‍ പ്രമേഹം കണ്ടുവരാറുണ്ട്. ഇത് ശരീരത്തില്‍ ഗ്ലൂക്കോസ് നിയന്ത്രിക്കാന്‍ പാകത്തിന് ഇന്‍സുലിന്‍ ഇല്ലാതെ വരുമ്പോഴാണ് ഉണ്ടാകുന്നത്. ഇത് കുഞ്ഞിന് ദോഷം ചെയ്യും. തിരിച്ചറിഞ്ഞാന്‍ ചികിത്സിച്ചു മാറ്റാവുന്ന ഈ രോഗം ഗര്‍ഭശേഷം അമ്മയ്ക്ക് ടൈപ്പ് 2 പ്രമേഹം ഉണ്ടാക്കാനുള്ള സാധ്യതയും കൂടുതലാണ്.

30 വയസിനു ശേഷം ഗര്‍ഭം ധരിച്ചാല്‍ കുഞ്ഞിന് വൈകല്യങ്ങളുണ്ടാകാനും അബോര്‍ഷന്‍ നടക്കാനുമുള്ള സാധ്യതകള്‍ കൂടുതലാണ്. ഇത് ക്രോമസോമിലുള്ള പ്രശ്‌നങ്ങള്‍ കാരണമാണ് ഉണ്ടാകുന്നത്.

വൈകി ഗര്‍ഭം ധരിക്കുന്നവരില്‍ സാധാരണ പ്രസവത്തിനുള്ള സാധ്യതയും കുറയുകയാണ് ചെയ്യുന്നത്. ഇത്തരം കാരണങ്ങള്‍ കൊണ്ടാണ് 30 വയസിനു താഴെ ഗര്‍ഭിണിയാകേണ്ടതിന്റെ ആവശ്യകത വൈദ്യശാസ്ത്രം എടുത്തുപറയുന്നത്.