ഗര്‍ഭകാലത്തെ ചിട്ടകള്‍ അറിയൂ

എന്തൊക്കെ ഭക്ഷണം കഴിയ്ക്കണമെന്നതു സംബന്ധിച്ച് ഗര്‍ഭിണികള്‍ക്ക് പൊതുവെ സംശയങ്ങളുണ്ടായിരിക്കും. എല്ലാ തരം പോഷകങ്ങളുമടങ്ങിയ ഭക്ഷണമാണ് സ്ത്രീകള്‍ കഴിയ്‌ക്കേണ്ടത്. എന്നാല്‍ കൊഴുപ്പടിയാനും പാടില്ല. പ്രോട്ടീന്‍, കാര്‍ബോഹൈഡ്രേറ്റ്, അയേണ്‍, കാല്‍സ്യം, നല്ല കൊഴുപ്പ് എന്നിവ ഭക്ഷണത്തില്‍ ഉള്‍പ്പെടുത്തണം.

മുട്ട, പാല്‍, മുളപ്പിച്ച പയര്‍വര്‍ഗങ്ങള്‍, മീന്‍ തുടങ്ങിയവ പ്രോട്ടീന്‍ നല്‍കും. ബ്രൗണ്‍ ബ്രെഡ്, ഫലവര്‍ഗങ്ങള്‍, പച്ചക്കറി സാലഡ് തുടങ്ങിയവ കാര്‍ബോഹൈഡ്രേറ്റ് ലഭിക്കാന്‍ സഹായിക്കും.

ഇലക്കറികള്‍, പച്ചക്കറികള്‍, ബീന്‍സ്, മാതളനാരങ്ങ, ചെറി, ബെറി, ലിച്ചി, പൈനാപ്പിള്‍, ഉണക്കമുന്തിരി, ഈന്തപ്പഴം, ഫിഗ് തുടങ്ങിയവ അയേണ്‍ സമൃദ്ധമായ ഭക്ഷണങ്ങളാണ്.

പാലുല്‍പന്നങ്ങളിലും മത്സ്യത്തിലും മറ്റ് കടല്‍വിഭവങ്ങളിലും കാല്‍സ്യം അടങ്ങിയിട്ടുണ്ട്. കാല്‍സ്യം കുഞ്ഞിന്റെ എല്ലുകളുടെ വളര്‍ച്ചക്ക് വളരെ അത്യാവശ്യമായ ഘടകമാണ്.

വ്യായാമം ഗര്‍ഭകാലത്തെ ശാരീരിക അസ്വസ്ഥതകള്‍ക്ക് ഒരു പരിധി വരെ പരിഹാരമാകും. പ്രസവം എളുപ്പമാക്കാനും അസുഖങ്ങള്‍ ഒഴിവാക്കാനും ഗര്‍ഭകാല വ്യായാമം സഹായിക്കും.

ഗര്‍ഭകാലത്ത് മോണരോഗങ്ങളും പല്ലിനു പ്രശ്‌നങ്ങളും വരുന്നതായി കണ്ടുവരുന്നുണ്ട്. ഇതൊഴിവാക്കാന്‍ ദന്തസംരക്ഷണവും അത്യാവശ്യം തന്നെ.