ഗര്‍ഭിണികളിലെ തലവേദന, കാരണങ്ങള്‍

ഗര്‍ഭിണികളില്‍ തലവേദന കൂടുതലായും കാണുന്നത് ആദ്യത്തെയും അവസാനത്തെയും മൂന്നുമാസങ്ങളിലാണ്. എന്നാല്‍ അവസാനത്തെ മൂന്നുമാസങ്ങളിലുള്ള തലവേദന അധികം കടുത്തതായിരിക്കില്ല.

ഗര്‍ഭാവസ്ഥയില്‍ തലവേദന വരുന്നതിന് പല കാരണങ്ങളാണ്. ഹോണ്‍മോണ്‍ വ്യത്യാസങ്ങളാണ് ഇതില്‍ പ്രധാനം. പല പുതിയ ഹോര്‍മോണുകള്‍ ഉല്‍പാദിപ്പിക്കപ്പെടുന്ന സമയമാണിത്.

ടെന്‍ഷനും സ്‌ട്രെസും ഗര്‍ഭകാലത്തെ തലവേദനയ്ക്ക് പ്രധാന കാരണങ്ങളാണ്. പ്രത്യേകിച്ച് ആദ്യമായാണ് ഗര്‍ഭിണിയാകുന്നതെങ്കില്‍ പലവിധ ആകുലതകളുമുണ്ടാകാം. ഗര്‍ഭിണി ജോലി ചെയ്യുന്നുണ്ടെങ്കില്‍ അതിന്റെ ടെന്‍ഷന്‍ കൂടിയാകുമ്പോള്‍ തലവേദന ഇരട്ടിക്കും. യാത്ര ചെയ്യുന്നതും തലവേദനയ്ക്ക് കാരണമാകാം.

ബിപിയുള്ളവര്‍ക്ക് തലവേദന വരാറുണ്ട്. ഗര്‍ഭിണിയായിരിക്കെ ചിലര്‍ക്ക് ബിപി ഉണ്ടാകാറുണ്ട്. ഇതും തലവേദനയ്ക്ക് കാരണമാകാം. ഗര്‍ഭിണികള്‍ക്ക് ഇടയ്ക്കിടെ തലവേദന വരുന്നതിന് കാരണം ബിപിയുമാകാം. അതുകൊണ്ട് തലവേദന അവഗണിക്കരുത്.

ഗര്‍ഭിണികള്‍ വണ്ണം വയ്ക്കുന്നതും ശരീരഭാരം കൂടുന്നതും സാധാരണമാണ്. ഇത് ശരീരത്തിന് ആയാസമുണ്ടാക്കും. ശരീരത്തിന്റെ തളര്‍ച്ച മനസിനേയും ബാധിക്കും. ഇതും തലവേദനയ്ക്ക് കാരണമാകാം.

ശരിയായ രീതിയില്‍ കിടക്കുകയും ഇരിക്കുകയും ചെയ്തില്ലെങ്കിലും തലവേദന വരാം. പ്രത്യേകിച്ചും ഗര്‍ഭത്തിന്റെ അവസാന മാസങ്ങളില്‍ ശരീരഭാരം കൂടുമ്പോള്‍ ശരിയായ രീതിയില്‍ കിടന്നില്ലെങ്കില്‍ തലവേദനയും കഴുത്തു വേദനയും വരാന്‍ സാധ്യത കൂടുതലാണ്.

തലവേദന വരുമ്പോള്‍ വേദനസംഹാരികള്‍ കഴിക്കാതെ ഡോക്ടറുടെ നിര്‍ദേശം തേടുകയാണ് ഗര്‍ഭിണികള്‍ക്ക് നല്ലത്.