അബോര്‍ഷന് ശേഷം ഗര്‍ഭിണിയാകാന്‍ ഇടവേള നന്ന്

Pre Natal

oi-Saritha

By Veena

Published: Monday, December 5, 2011, 15:02 [IST]

ഒരു അബോര്‍ഷന്‍ സംഭവിച്ച ശേഷം എപ്പോള്‍ ഗര്‍ഭിണിയാകുന്നതാണ് ഉചിതമെന്നത് പല സ്ത്രീകളുടേയും സംശയമാണ്. മനപൂര്‍വമല്ലാത്ത അബോര്‍ഷന്‍ സംഭവിച്ച സ്ത്രീകളില്‍ രണ്ടാമത് എത്രയും വേഗം അമ്മയാകാനുള്ള ആഗ്രഹമുണ്ടാകുന്നത് സ്വാഭാവികവും.

എന്നാല്‍ അബോര്‍ഷന് ശേഷം ഗര്‍ഭം ധരിക്കാന്‍ അല്‍പം ഇടവേള നല്ലതാണ്. ഗര്‍ഭച്ഛിദ്രം ഒരു സ്ത്രീയുടെ ശാരീരിക, മാനസിക ആരോഗ്യത്തിന് കോട്ടം വരുത്തുന്നുണ്ട്. അബോര്‍ഷന് ശേഷം ആദ്യം വേണ്ടത് ഈ ആരോഗ്യം വീണ്ടെടുക്കുക എന്നതാണ്.

ശാരീരിക ആരോഗ്യത്തിന് ആരോഗ്യകരമായ ഗര്‍ഭത്തില്‍ മുഖ്യപങ്കാണുള്ളത്. അബോര്‍ഷന് ശേഷം സ്ത്രീയൂടെ ശരീരവും ഗര്‍ഭപാത്രവും പൊതുവെ ദുര്‍ബലമായിരിക്കും. ശരിയായ ഭക്ഷണവും വിശ്രമവും ആരോഗ്യം വീണ്ടെടുക്കാന്‍ പ്രധാനമാണ്.

അബോര്‍ഷന് ശേഷം ചിലരില്‍ രണ്ടാഴ്ച വരെ ബ്ലീഡിംഗ് ഉണ്ടാകും. ആദ്യത്തെ മൂന്നുമാസത്തിനിടെയാണ് അബോര്‍ഷന്‍ നടന്നതെങ്കില്‍ ആറാഴ്ച വരെ ബ്ലീഡിംഗ് ഉണ്ടാകാനുള്ള സാധ്യതയുണ്ട്. ഈ സമയത്ത് ശരീരത്തിന് പൂര്‍ണമായ വിശ്രമം ആവശ്യമാണ്. അല്ലെങ്കില്‍ അത് യൂട്രസിന്റെ ആരോഗ്യത്തെ ബാധിക്കും.

വീണ്ടും ശരിയായ വിധത്തില്‍ മാസമുറ തുടങ്ങിയാല്‍ നിങ്ങളുടെ ഗര്‍ഭപാത്രം വീണ്ടും ഗര്‍ഭം ധരിക്കാന്‍ തയ്യാറായെന്നാണ് കാണിക്കുന്നത്. എന്നാല്‍ ചിലരില്‍ അബോര്‍ഷന് ശേഷം അണുബാധ, വയറുവേദന തുടങ്ങിയ പ്രശ്‌നങ്ങള്‍ കണ്ടുവരാറുണ്ട്. ഇത് പൂര്‍ണമായും ഡോക്ടറെ കണ്ട് ചികിത്സിച്ച് മാറ്റിയ ശേഷം മാത്രമെ ഗര്‍ഭം ധരിക്കാന്‍ ശ്രമിക്കാവൂ. അല്ലെങ്കില്‍ അമ്മയുടേയും കുഞ്ഞിന്റെയും ആരോഗ്യത്തിന് ഇത് കുഴപ്പമുണ്ടാക്കും.