'ഗര്‍ഭിണികള്‍ ഇതു കഴിക്കരുത്'

Published: Tuesday, September 27, 2011, 15:57 [IST]

ഗര്‍ഭിണിയാണെങ്കില്‍ നാലുപാടു നിന്നും ഉപദേശങ്ങളെത്തും, ചെയ്യരുത്, ചെയ്യണം, കഴിക്കരുത്, കഴിക്കണം എന്നിങ്ങനെ. എന്തൊക്കെയായാലും ഭക്ഷണക്കാര്യത്തില്‍ ഏറെ ശ്രദ്ധിക്കണം. പോഷകാഹാരത്തിനൊപ്പം പഴവര്‍ഗങ്ങള്‍ കഴിക്കുന്നതും ജനിക്കാന്‍ പോകുന്ന കുഞ്ഞിന്റെ ആരോഗ്യത്തിന് ഏറെ നല്ലതാണ്.

എന്നാല്‍ ഗര്‍ഭകാലത്ത് കഴിച്ചുകൂടാത്ത ചില പഴങ്ങളുമുണ്ട്. പപ്പായ, കറുത്ത മുന്തിരി, പൈനാപ്പിള്‍ തുടങ്ങിയ ഉപേക്ഷിക്കുന്നതാണ് നല്ലതെന്ന് പഠനങ്ങള്‍ തെളിയിച്ചിട്ടുണ്ട്.

ഗര്‍ഭിണികള്‍ പച്ച പപ്പായയും പകുതി പഴുത്തതും കഴിക്കുന്നത് ഗര്‍ഭമലസുന്നതിന് കാരണമായേക്കും. ഇവയിലടങ്ങിയിരിക്കുന്ന ലാറ്റെക്‌സാണ് ഗര്‍ഭാശയം ചുരുങ്ങുന്നതിന് കാരണമാകും. നന്നായി പഴുത്ത പപ്പായ കഴിക്കുന്നതുകൊണ്ട് കുഴപ്പമില്ലെന്നാണ് കണ്ടെത്തല്‍. ഇതിലുളള വൈററമിന്‍ സിയും ന്യൂട്രിജനുകളും മലബന്ധം, നെഞ്ചെരിച്ചില്‍ എന്നിവ അകറ്റാനായി നല്ലതാണ്.

കറുത്ത മുന്തിരി കഴിക്കുന്നത് ആദ്യത്തെ മൂന്നുമാസമെങ്കിലും ഒഴിവാക്കണം. ഇവ ശരീരത്തില്‍ ചൂടുല്‍പാദിപ്പിക്കുന്നു. ഇത് കുഞ്ഞിന് നല്ലതല്ല.

പൈനാപ്പിളില്‍ ധാരാളം ബ്രോമെലിന്‍ അടങ്ങിയിട്ടുണ്ട്. ഇത് നേരത്തെ പ്രസവം നടക്കാന്‍ ഇടയാക്കും. ഗര്‍ഭത്തിന്റെ ആദ്യമൂന്നുമാസങ്ങളില്‍ എന്തായാലും പൈനാപ്പിള്‍ ഒഴിവാക്കണം. പ്രസവസമയമടുക്കുമ്പോള്‍ പൈനാപ്പിള്‍ ജ്യൂസ് കഴിക്കുന്നത് നല്ലതാണ്. ഇത് ഡോക്ടറുടെ ഉപദേശമനുസരിച്ചു ചെയ്യുന്നതാണ് നല്ലത്.

അണുബാധയും അസുഖങ്ങളുമൊഴിവാക്കാനായി പഴങ്ങളും പച്ചക്കറികളും കഴുകിമാത്രം ഉപയോഗിക്കാന്‍ ഗര്‍ഭിണികള്‍ ശ്രദ്ധിക്കണം.