ഗര്‍ഭകാലത്ത് ജങ്ക് ഫുഡ് വേണ്ട

Pre Natal

oi-Staff

By Super

Updated: Friday, March 15, 2013, 15:38 [IST]

ഗര്‍ഭകാലത്ത് അമ്മയ്ക്കുള്ള പരിചരണം ഉള്ളിലുള്ള കുഞ്ഞിനെക്കൂടി ഉദ്ദേശിച്ചുള്ളതാവണമെന്നാണ് പൊതുവേ പറയാറുള്ളത്, അമ്മയില്‍ നിന്നുള്ള പോഷണങ്ങളാണ് കുഞ്ഞിന്റെ വളര്‍ച്ചയെ നിര്‍ണ്ണയിക്കുന്നത്. ഗര്‍ഭകാലത്ത് ഭക്ഷണത്തില്‍ കൃത്യമായ നിഷ്ഠയാണ് വേണ്ടത്, കൃത്യ സമയത്തിന് ഭക്ഷണം എന്നതുപോലെതന്നെ എന്തൊക്കെ കഴിയ്ക്കരുത്, കഴിയ്ക്കാം എന്നീ കാര്യങ്ങളിലുമുണ്ട് നിഷ്‌കര്‍ഷകള്‍ പലത്.

അന്നജ സമ്പുഷ്ടമായ ഭക്ഷണങ്ങള്‍

അരിവിഭവങ്ങള്‍, ചപ്പാത്തി, ഓട്ട്മീല്‍ എന്നിവയെല്ലാം നല്ല അന്നജ സമ്പുഷ്ടമായ ഭക്ഷണങ്ങളാണ്. ഇവ നിത്യഭക്ഷണത്തിന്റെ ഭാഗമാക്കുക. ഇതില്‍ ഉയര്‍ന്ന കലോറിയും വിറ്റമിനുകളും അടങ്ങിയിട്ടുണ്ട്. അരി ഉപയോഗിക്കുമ്പോള്‍ ചെമ്പാവരി ഉപയോഗിക്കാന്‍ ശ്രമിക്കുക

പാലുല്‍പ്പന്നങ്ങള്‍ ഗര്‍ഭിണി തീര്‍ച്ചയായി കഴിച്ചിരിക്കേണ്ടതാണിത്, പാലുല്‍പ്പന്നങ്ങളില്‍ത്തന്നെ കൊഴുപ്പധികമില്ലാത്തത് വേണം ശീലമാക്കാന്‍. കൊഴുപ്പു കുറഞ്ഞ പാല്‍, കട്ടത്തൈര്, മോര്, ചീസ്, ബട്ടര്‍ എന്നിവയെല്ലാം ഉപയോഗിക്കാം, ഇവയില്‍ ഒട്ടേറെ കാല്‍സ്യം അടങ്ങിയിട്ടുണ്ട്. ഇവ എല്ലുകളെ ശക്തിപ്പെടുത്തും. ഇവയില്‍ അടങ്ങിയിരിക്കുന്ന സിങ്ക്, അയൊഡിന്‍ പോലുള്ള വക്തുക്കള്‍ കുഞ്ഞിന്റെ വളര്‍ച്ച് അത്യാവശ്യമാണ്.

പഴങ്ങളും പച്ചക്കറികളും

ഇവയെക്കുറിച്ച് പ്രത്യേകിച്ച് പറയേണ്ടതില്ല, പാതിവേവിച്ചോ മറ്റോ പച്ചക്കറികള്‍ കഴിയ്ക്കാവുന്നത്രയും കഴിയ്ക്കുക. പഴങ്ങളുടെ കാര്യവും ഇങ്ങനെതന്നെ, ഇവയിലടങ്ങിയിരിക്കുന്ന ധാതുലവണങ്ങള്‍ കുറച്ചൊന്നുമല്ല ഗര്‍ഭാവസ്ഥയില്‍ സഹായകമാവുക. മാത്രമല്ല ഇവയിലടങ്ങിയിരുന്ന നാരുകള്‍ ദഹനേന്ദ്രിയത്തിന്റെയും കുടലുകളുടെയും പ്രവര്‍ത്തനങ്ങള്‍ കാര്യക്ഷമമാക്കും. തന്മൂലം ഗര്‍ഭകാലത്ത് സാധാരണമായ ഗ്യാസ്ട്രബിള്‍ മലബന്ധം പോലുള്ള പ്രശ്‌നങ്ങള്‍ നിയന്ത്രിക്കാന്‍ കഴിയും.